მოსამართლე ჯვებე ნაჭყებიამ "თანაინვესტირების ფონდის" ყოფილ გენერალურ დირექტორს, გიორგი ბაჩიაშვილს, საზღვრის უკანონო კვეთის საქმეზე პატიმრობა მოუხსნა.

მოსამართლის ეს გადაწყვეტილება პროკურორის შუამდგომლობის დაკმაყოფილების შედეგად მიიღო. დღევანდელ პროცესზე ბრალდების მხარემ დააყენა მოთხოვნა, ბაჩიაშვილის მიმართ პატიმრობის ღონისძიება გაუქმებულიყო. პროკურორ ვაჟა თოდუას თქმით, ბაჩიაშვილს უკვე მისჯილი აქვს 11-წლიანი თავისუფლების აღკვეთა და დამატებითი აღკვეთის ღონისძიება საჭირო აღარ არის. ბაჩიაშვილის ადვოკატ ლევან მახარაშვილის განცხადებით, ის პირველად დაეთანხმა ბრალდების მხარის პოზიციას. დღევანდელ სხდომას ბაჩიაშვილისთვის საზღვრის უკანონოდ გადაკვეთაში დახმარების ფაქტზე ბრალდებული შოთა ქარუმიძე.

შეგახსენებთ, რომ "თანაინვესტირების ფონდის" ყოფილ გენერალურ დირექტორმა, გიორგი ბაჩიაშვილმა საქართველო მანამ დატოვა, სანამ სასამართლო "კრიპტოვალუტის მითვისების" საქმეზე 11 წლით თავისუფლების აღკვეთას მიუსჯიდა.

პროკურატურამ ბაჩიაშვილს ბრალდება წარუდგინა სსკ-ის 344-ე მუხლის პირველი ნაწილის საფუძველზე (საზღვრის უკანონო კვეთა). ხოლო ქარუმიძეს ბრალი წარდგენილი აქვს სსკ-ის 25-ე და 344-ე მუხლების პირველი ნაწილის მიხედვით — საქართველოს სახელმწიფო საზღვრის უკანონო კვეთაში დახმარება, რაც 3-დან 5 წლამდე თავისუფლების აღკვეთას ითვალისწინებს.