თბილისის მერია აცხადებს, რომ დავით ნარმანიას ჯილდო გადაეცა თბილისში უპრეცედენტოდ დიდი მასშტაბის სპორტული ღონისძიებების უმაღლეს დონეზე ორგანიზებისთვის.

დედაქალაქის მერს ჯილდო მოვლენათა და სპორტული ტურიზმის საერთაშორისო კონფერენციაზე, ნაციონალური ბიზნეს რეიტინგების კავშირის პრეზიდენტმა ვალერი გიჟიცკიმ გადასცა.

კონფერენციაზე დავით ნარმანიამ დამსწრე საზოგადოებას სიტყვით მიმართა და განაცხადა, რომ თბილისის მერია მომავალშიც აქტიურად დაუჭერს მხარს სპორტული ღონისძიებების ორგანიზებას:

"დედაქალაქის მერია, სპორტის სამინისტროსთან ერთად, ძალიან ბევრ რეგიონულ და ევროპული მნიშვნელობის ღონისძიებებს უჭერს მხარს, რათა სპორტული ტურიზმით დაინტერესებული ადამიანები ჩვენს ქალაქში ჩამოვიდნენ. მათი შემოსვლა პირდაპირ დაკავშირებულია ტურიზმის განვითარებასთან, მეტ შემოსავალთან და მეტი ადამიანის დასაქმებასთან".

სპორტული ტურიზმის საერთაშორისო კონფერენცია დღეს სასტუმრო „ჰუალინგ თბილისში“ , მერიის მხარდაჭერითა და საქართველოს კორპორატიული სპორტის ფედერაციის ორგანიზებით გაიმართა.