საქართველოს მკლავჭიდის ერთიანი ეროვნული ფედერაცია განცხადებას ავრცელებს, სადაც აღნიშნულია, რომ 2025 წლის 10 სექტემბერს მკლავჭიდისა და პარა-მკლავჭიდის მსოფლიო ჩემპიონატები ყველა ასაკობრივი კატეგორიისთვის იწყება. მათივე განცხადებით, საქართველოს ნაკრები ამ პრესტიჟულ ტურნირში მონაწილეობას ვერ მიიღებს.

"მსოფლიო მკლავჭიდის ფედერაცია ითხოვს ფინანსური ვალდებულების შესრულებას, რომელიც 2020 წლის ბათუმის მსოფლიო ჩემპიონატის ჩაშლიდან მომდინარეობს. აღნიშნული ვალდებულება გამოწვეული იყო მაშინდელი სამინისტროს მიერ მიღებული გადაწყვეტილებებით, რამაც გამოიწვია ხელშეკრულების დარღვევა. მსოფლიო მკლავჭიდის ფედერაციის მიერ შემოთავაზებულია ან სრული ფინანსური ვალდებულების დაფარვა, ან წლიურად 30,000 ევროს საჯარიმო თანხის შენატანის განხორციელება," — წერია გავრცელებულ განცხადებაში.

მკლავჭიდის ფედერაციის ცნობით, სპორტის სამინისტრო თავს იკავებს ფინანსური ვალდებულების ან/და ერთჯერადი საჯარიმო თანხის გადახდის შესრულებისგან და აცხადებს, რომ საკითხი სასამართლოში უნდა იქნეს გადაწყვეტილი.

"საქართველოს მკლავჭიდის ფედერაციის მიერ სპორტის სამინისტროს წინააღმდეგ შეტანილი სარჩელის განხილვა უკვე 5 წელია გრძელდება. სამწუხაროდ, სასამართლოს მიერ პირველი მოსმენაც კი არ ჩატარებულა, რაც შეუძლებელს ხდის სიმართლის დადგენას და სპორტული დავის მოგვარებას," — აღნიშნულია განცხადებაში.

ფედერაციის თქმით სასამართლო სისტემის უმოქმედობის გამო რიგი პრობლემები იქნება:

• საქართველოს უძლიერესი მკლავჭიდელები რჩებიან კონკურენციის გარეშე;

• ზიანდება ქვეყნის სპორტული პრესტიჟი;

• მწვრთნელებისა და სპორტსმენთა მრავალწლიანი შრომა უშედეგოდ რჩება;

• ქართული სპორტის გულშემატკივრები მოკლებული არიან შესაძლებლობას ჩვენი მკლავჭიდელების და პარა-მკლავჭიდელების მხარდაჭერისგან.

მკლავჭიდის ფედერაცია სასამართლო სისტემას ამ საქმის განხილვის დაჩქარებისკენ მოუწოდებს.

"საქართველოს მკლავჭიდის ფედერაცია მოუწოდებს შესაბამის უწყებებს, განსაკუთრებით სასამართლო სისტემას, დააჩქაროს საქმის განხილვა და უზრუნველყოს სამართლიანი გადაწყვეტილების მიღება [...] ასევე მივმართავთ სპორტის სამინისტროს, რომ მონახოს გზა, რათა მსოფლიოს ლიდერი გუნდი არ დარჩეს მსოფლიო ჩემპიონატზე წასვლის გარეშე," — წერია განცხადებაში.