რუსეთმა ოთხშაბათს მასშტაბური საზღვაო წვრთნები დაიწყო, რომელშიც, ქვეყნის თავდაცვის სამინისტროს განცხადებით, 150-ზე მეტი გემი და 15 000-ზე მეტი სამხედრო პირი მონაწილეობს. წვრთნები წყნარ და არქტიკის ოკეანეებში, ასევე ბალტიისა და კასპიის ზღვებში მიმდინარეობს. ამის შესახებ ინფორმაციას Reuters ავრცელებს.

წვრთნებს, რომელსაც "ივლისის ქარიშხალი" ჰქვია, მიმდინარე წლის 23–27 ივლისის პერიოდში ჩაატარებენ. მისი მიზანი არასტანდარტული ოპერაციებისთვის ფლოტის მზადყოფნის გამოცდაა, გრძელდისტანციური იარაღისა და სხვა თანამედროვე ტექნოლოგიების (მათ შორის უპილოტო სისტემების) გამოყენებაში.

"ზღვაში გემების ეკიპაჟები საბრძოლო ზონებში გადასვლას, წყალქვეშა ნავების წინააღმდეგ მოქმედებებს, დანიშნულ ადგილებში განლაგების დაცვას და ეკონომიკური საქმიანობის უსაფრთხოების უზრუნველყოფას დაამუშავებენ," — აღნიშნულია სამინისტროს განცხადებაში.

წვრთნების დროს სამხედროები ჰაერიდან მომავალი იერიშების, უპილოტო ნავებისა და მტრის დრონების მოგერიებაში, ნავიგაციის უსაფრთხოებაში, მტრის ობიექტებსა და საზღვაო ჯგუფებზე შეტევაშიც ივარჯიშებენ.

წვრთნებში მონაწილეობას 120-ზე მეტი საფრენი აპარატი და 10 სახმელეთო სარაკეტო სისტემა მიიღებს.

Reuters-ის ცნობით, წვრთნებს რუსეთის სამხედრო-საზღვაო ძალების მეთაური, ადმირალი ალექსანდრ მოისეევი ხელმძღვანელობს.

გასაჯაროებული რეიტინგების მიხედვით, რუსეთი მსოფლიოში მესამე ყველაზე ძლიერ საზღვაო ძალად ითვლება ჩინეთისა და აშშ-ის შემდეგ, თუმცა ფლოტმა უკრაინის ომში არაერთი მძიმე და სენსაციური დანაკარგი განიცადა.