უკრაინის საგარეო საქმეთა მინისტრი ანდრეი სიბიგა რუსეთის მიერ უკრაინის მოქალაქეების საქართველოს გავლით დეპორტაციას გამოეხმაურა და სოციალურ ქსელში დაწერა, რომ შემდგომი გართულებების თავიდან ასაცილებლად საჯაროდ სთავაზობენ მათ დეპორტირებული მოქალაქეების უკრაინის საზღვარზე გადმოყვანას.

"რუსეთი უკრაინელი მოქალაქეების საქართველოს გავლით დეპორტაციას იარაღად იყენებს. ჩვენ ვთავაზობთ რუსეთს, აღნიშნული მოქალაქეები პირდაპირ უკრაინის საზღვარზე გადაიყვანოს.

ივნისის შემდეგ, რუსეთმა უკრაინის მოქალაქეთა, ძირითადად ყოფილი მსჯავრდადებულების, დეპორტაცია საქართველოს საზღვართან, მნიშვნელოვნად გაზარდა.

შედეგად, ათობით ადამიანი, რომელთაგან მრავალს არ გააჩნია სათანადო დოკუმენტაცია, ჩარჩენილია სატრანზიტო ზონაში.

უკრაინელი კონსულები აქტიურად მუშაობენ მათთვის დოკუმენტების გასაცემად და მათ მოლდოვის გავლით უკრაინაში გადასაყვანად.

43 მოქალაქე უკვე ევაკუირებულია, მათ შორის ყოფილი პოლიტიკური პატიმარი ანდრი კოლომიეცი. თუმცა, საქართველოს საზღვარზე კვლავ რჩებიან ადამიანები, რომელთაც მძიმე პირობებში უწევთ ყოფნა.

ჩვენ აქტიურად ვთანამშრომლობთ საქართველოსა და მოლდოვის მხარეებთან, რათა ჩვენი მოქალაქეები უკრაინაში გადმოვიყვანოთ. თუმცა, არ არსებობს გარანტია, რომ რუსეთი კიდევ უფრო არ გაზრდის დეპორტირებულთა რაოდენობას.

შემდგომი გართულებების თავიდან ასაცილებლად, საჯაროდ ვთავაზობთ რუსეთს, ამ კატეგორიის უკრაინელი მოქალაქეები პირდაპირ უკრაინის საზღვარზე გადმოიყვანოს. ჩვენ მზად ვიქნებით, იქიდან გადავიბაროთ ისინი. არსებობს საზღვრის შესაბამისი მონაკვეთები, სადაც ეს შეიძლება განხორციელდეს.

ჩვენ ეს შეთავაზება ოფიციალური არხებით გადავეცით როგორც რუსეთს, ისე საერთაშორისო ორგანიზაციებს", — დაწერა ანდრეი სიბიგამ.

ცნობისთვის, 17 ივლისის მონაცემებით, რუსეთის მიერ დეპორტირებული თითქმის 60 უკრაინელი რუსეთ-საქართველოს საზღვარზე იყო ჩარჩენილი. ისინი იძულებულნი არიან სარდაფში იცხოვრონ, რადგან უკან დაბრუნების ნებართვა არ აქვთ. ინფორმაცია ამის შესახებ BBC-მ გაავრცელა.

რუსეთიდან დეპორტირებული უკრაინელები საქართველო-რუსეთის საზღვარზე არიან ჩარჩენილი