შუახევის მუნიციპალიტეტის სოფელ სხეფის საჯარო სკოლის მასწავლებლის, მარინა დარჩიძის მიმართ, რომელმაც ქართული ოცნების დროშებით ხელში პირველი კლასის მოსწავლეებთან ერთად გადაღებული ფოტო ფეისბუკზე გაავრცელა, ცესკომ სამართალდარღვევათა ოქმი შეადგინა.

საქართველოს ცენტრალური საარჩევნო კომისიის ცნობით, აღნიშნულთან დაკავშირებით შუახევის საოლქო კომისიას განცხადებით საერთაშორისო გამჭვირვალობა - საქართველომ მიმართა:

"მოკვლევის საფუძველზე შედგენილი სამართალდარღვევის ოქმი, რომელიც 1000 ლარიან ჯარიმას ითვალისწინებს, შემდგომი რეაგირებისთვის შესაბამის სასამართლოს გადაეგზავნა."

"კლასში აფრიალებდნენ [დროშებს] ბავშვები, მერე რა მოხდა? მაგას ვერ დავუკვირდი, რომ აგიტაციასავით გამომივიდოდა, მე არასდროს არცერთ პარტიაში არ ვყოფილვარ და არცერთი პარტიის მომხრე ვარ", - ამბობდა მასწავლებელი, რომელმაც აღნიშნული ფოტო მედიის დაინტერესების შემდეგ ფეისბუკიდან წაშალა.

შესწორება: სტატიის თავდაპირველ სათაურში ეწერა, რომ მასწავლებელი 1 000 ლარით დაჯარიმდა, თუმცა შესაბამისი გადაწყვეტილება სასამართლომ უნდა მიიღოს.