რუსეთის კომუნისტური პარტია პრემიერმინისტრ მიხაილ მიშუსტინისადმი ახალი ინიციატივის წარდგენას გეგმავს, რომლის მიხედვითაც, იმ რესტორნებს, რომლებიც "მტრული" ქვეყნების სამზარეულოს სთავაზობენ მომხმარებლებს, დამატებითი გადასახადი დაეკისრებათ. ამის შესახებ პარტიის ლიდერმა სერგეი მალინკოვიჩმა გამოცემა Абзац-თან 16 ივლისს განაცხადა. ინფორმაციას Deutsche Welle ავრცელებს.

მისი თქმით, "არასწორია იმ ქვეყნების სამზარეულოს პოპულარიზაცია, რომლებიც მტრულად არიან განწყობილნი რუსეთის მიმართ. ამავე დროს, ისინი თავად არ უწყობენ ხელს რუსული რესტორნების განვითარებას საზღვარგარეთ."

მალინკოვიჩის განცხადებით, პირველ რიგში გადასახადი იტალიური, ფრანგული, სამხრეთკორეული, იაპონური, ესპანური და გერმანული სამზარეულოს მქონე დაწესებულებებზე უნდა დაწესდეს. ამ ლოგიკით, გადასახადი დაუწესდება იმ რესტორნებს, რომლის მენიუშიც იტალიური პიცა, იაპონური სუში, ფრანგული კრუასანი და ესპანური პაელა იქნება.

"მაგალითად, საფრანგეთი, გერმანია, იტალია აქტიურად ეწინააღმდეგებიან რუსეთს. იაპონია კი დიდი ხანია ჩვენი ტერიტორიების მიღებას ცდილობს. ამიტომ ამ ქვეყნების კერძებზე დამატებითი 12%-იანი გადასახადი უნდა დაწესდეს, ხოლო დანარჩენებზე — 10%", — თქვა მან.

ასევე, მალინკოვიჩმა ყურადღება გაამახვილა თურქული და აზერბაიჯანული რესტორნების საქმიანობაზეც, რომელთა მიმართაც რუსეთის ურთიერთობები ბოლო თვეებში გაუარესდა. თუმცა "მეგობრული" ქვეყნების სამზარეულოს, მისივე თქმით, არ უნდა შეეხონ. ასეთებად იგი ბელარუსს, ვიეტნამს, ჩრდილოეთ კორეას, არაბულ ქვეყნებს, ლათინურ ამერიკას და უზბეკეთს ასახელებს.

რუსეთის მიერ ოფიციალურად "მტრულად განწყობილ ქვეყნების" სიაში ამჟამად 49 ქვეყანა შედის, მათ შორის — ევროკავშირის ქვეყნები (სლოვაკეთისა და უნგრეთის გარდა), აშშ, იაპონია, დიდი ბრიტანეთი, ავსტრალია, უკრაინა, შვეიცარია და მონტენეგრო. სიაში საქართველო არ არის.