Amnesty International საბა ჯიქიასთვის პატიმრობის შეფარდებასთან დაკავშირებით განცხადებას ავრცელებს.

Amnesty International-ის აღმოსავლეთ ევროპისა და ცენტრალური აზიის დირექტორის მოადგილის, დენის კრივოშეევის თქმით, საბა ჯიქიას სასამართლო პროცესი სამართლიანი სასამართლოს სტანდარტებთან დაკავშირებით სერიოზულ კითხვებს აჩენს.

"საბა ჯიქიას სასამართლო პროცესი კითხვებს აჩენს სამართლიანი სასამართლოს სტანდარტებთან და ახალგაზრდული მართლმსაჯულების მექანიზმების გამოუყენებლობასთან დაკავშირებით, რომლებიც საქართველოს კანონმდებლობით განსაზღვრულია 18-21 წლამდე პირებისთვის. მის წინააღმდეგ მტკიცებულებად წარმოდგენილია ვიდეოჩანაწერი, რომლის სისწორესაც მისი დაცვის მხარე კითხვის ნიშნის ქვეშ აყენებს და ექსპერტის დასკვნა, რომელიც ბრალდების მხარის მოწმედ იქნა წარდგენილი და რომელსაც დაცვის მხარეს არ მიეცა შესაძლებლობა დაეკითხა," — აღნიშნულია კროვოშეევის განცხადებაში.

დენის კრივოშეევი მოუწოდებს საქართველოს ხელისუფლებას, შეწყვიტოს დაუსჯელობისა და უსამართლობის მავნე პრაქტიკა.

"ეს სელექციური მართლმსაჯულება უკიდურესად შემაშფოთებელია. საქართველოს ხელისუფლებამ დაუყოვნებლივ უნდა შეწყვიტოს ეს დაუსჯელობისა და უსამართლობის მავნე პრაქტიკა", — განაცხადა Amnesty International-ის აღმოსავლეთ ევროპისა და ცენტრალური აზიის დირექტორმა.

საბა ჯიქია 2024 წლის 5 დეკემბერს დააკავეს — მასობრივი პროევროპული პროტესტების დაწყებიდან ერთი კვირის შემდეგ, იმის გამო, რომ თითქოს წაქცეულ სპეცრაზმელს ფეხი ჩაარტყა. თავად დაზარალებული, რომელიც ინციდენტის დროს ფორმაში არ იყო, სასამართლოზე ჩვენებაში აცხადებდა, რომ არანაირი დაზიანება არ მიუღია.

Amnesty International-ის განმარტებით, საქართველოს ახალგაზრდული მართლმსაჯულების კანონმდებლობა ითხოვს, რომ 21 წლამდე პირებისთვის გამოყენებულ იქნას ყველაზე ნაკლებად შემზღუდავი ზომები და ალტერნატივა აღდგენითი მართლმსაჯულების ფორმით. თავისუფლების აღკვეთა ამ ასაკობრივ კატეგორიაში დასაშვებია მხოლოდ უკიდურეს შემთხვევაში და მხოლოდ უმოკლესი ვადით. მიუხედავად იმისა, რომ ახალგაზრდული მართლმსაჯულების პრინციპები საქართველოს სასამართლოებში ხშირად გამოიყენება 18-21 წლის პირების მიმართ, საბა ჯიქიას შემთხვევაში ისინი არ იქნა გამოყენებული.

Amnesty International-მა არაერთხელ იმსჯელა საქართველოში ანტისამთავრობო პროტესტების დროს ადამიანის უფლებების დარღვევებზე, მათ შორის სიტყვისა და შეკრების თავისუფლების უარყოფაზე, თვითნებურ დაკავებაზე, წამებასა და არასათანადო მოპყრობაზე, ასევე ძალადობაზე პროსამთავრობო ჯგუფების ან სამოქალაქო ფორმაში მყოფი სამართალდამცავების მხრიდან ოპოზიციური აქტივისტების წინააღმდეგ.

ორგანიზაციამ ცოტა ხნის წინ ახალი გლობალური კამპანია წამოიწყო — "მოითხოვე ანგარიშვალდებულება და სამართლიანობა საქართველოს მომიტინგეებისთვის!"