"არ მგონია, ის [თორნიკე რიჟვაძე] თურქეთში რაიმე სახით უფრო მეტ ან რაიმე გაუმჯობესებულ მკურნალობას ღებულობს", — ამის შესახებ ოცნების ხელისუფლების ჯანდაცვის მინისტრმა, მიხეილ სარჯველაძემ "რუსთავი ორის" ეთერში. განაცხადა. მისივე თქმით, რიჟვაძის თურქეთის კლინიკაში გადაყვანა რაიმე აუცილებლობით ნაკარნახევი არ ყოფილა.

"მეძლევა შესაძლებლობა, რომ საზოგადოებას მივაწოდო ინფორმაცია მისი ჯანმრთელობის დადებით დინამიკის შესახებ მას შემდეგ რაც ის ოჯახის თხოვნით გადაყვანილი იქნა ის თურქეთში მკურნალობის გასაგრძელებლად. იქიდანაც საიმედო ცნობებია, რასაც ვიღებთ და იმედი მაქვს, რომ ძალიან სწრაფად მოხდება ჯანმრთელობის აღდგენა.

[…] ვერ ვიტყოდი, რომ აუცილებლობა იყო, ეს იყო უბრალოდ ოჯახის თხოვნა. მათაც, რა თქმა უნდა, კარგად აეხსნათ, სრულფასოვნად მიეწოდათ ინფორმაცია არსებული მდგომარეობის შესახებ, რისკების მაქსიმალურად ნეიტრალიზების შესახებ აქ გატარებული ღონისძიებების შედეგად. თუმცა, მათ მაინც ამჯობინეს, მიეღოთ ეს გადაწყვეტილება, რასაც ბუნებრივია, რომ ანგარიში გავუწიეთ.

რაც შეეხება გადაწყვეტილებას, ეს აუცილებლობით ნაკარნახები ნამდვილად არ ყოფილა, ისიც შემიძლია ვთქვა, რომ არ მგონია, ის თურქეთში რაიმე სახით უფრო მეტ ან რაიმე გაუმჯობესებულ მკურნალობას ღებულობს. ჩვენი ექიმების სასახელოდ უნდა ითქვას, რომ ძირითადი და ყველაზე კრიტიკული პრობლემები, რაც არსებობდა, [გადავლილია].

პირველ რიგში, საგარეჯოს კლინიკაში ჩატარებული ოპერაციის შედეგად, ეს უნდა ვთქვათ და იქაურ სამედიცინო პერსონალს მადლობა გადავუხადო სწორად წარმართული პროცესისთვის, ოპერაცია ჩატარდა გადაუდებლად, შესანიშნავად და შემდგომ, რა თქმა უნდა, პირველ საუნივერსიტეტო კლინიკაში ეს კრიტიკული დღეები აბსოლუტურად უნაკლოდ და ზედმიწევნით სწორად იქნა მართული. შესაბამისად, ამან მოიტანა რეზულტატი და პრაქტიკულად, მდგომარეობა, რომელიც გუშინ საღამოს დაახლოებით ამ დროს ვნახეთ, იყო აბსოლუტურად დამაიმედებელი, სხვათა შორის, ამან გააჩინა შესაძლებლობა, რომ გადაყვანა მომხდარიყო, ეს პარამეტრები რომ არ გაუმჯობესებულიყო, იქნებოდა პრობლემა," — განაცხადა ოცნების ხელისუფლების ჯანდაცვის მინისტრმა მიხეილ სარჯველაძემ რუსთავი ორის ეთერში.

შეგახსენებთ, რომ 8 ივლისს ოცნების პრემიერმა პირველ საუნივერსიტეტო კლინიკაში მოინახულა თორნიკე რიჟვაძე. გვიან ღამით კი ის, ოჯახის სურვილით, სამკურნალოდ თურქეთის კლინიკაში გადაიყვანეს.

თორნიკე რიჟვაძე 2025 წლის 7 ივლისს, საგარეჯოს "ჯეოჰოსპიტალსში" გულმკერდის არეში ცეცხლნასროლი ჭრილობით შეიყვანეს. გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

ექიმების განმარტებით, მას ფილტვი ჰქონდა დაზიანებული.

თორნიკე რიჟვაძის საქმეზე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით საზღვაო ტრანსპორტის სააგენტოს უფროსი ალექსი ახვლედიანი დააკავეს.

8 ივლისს ალექსი ახვლედიანი 30 000-ლარიანი გირაო შეუფარდეს და სასამართლო დარბაზიდან გაათავისუფლეს.

მეტი თორნიკე რიჟვაძის თვითმკვლელობის მცდელობაზე: