საქართველოს პარლამენტის თავმჯდომარის შეფასებით, პრეზიდენტის მიერ პარლამენტის რიგგარეშე სხდომის არ დანიშვნა კონსტიტუციას არ შეესაბამება და ქვეყნის უმაღლესი საკანონმდებლო ორგანოს მიმართ უპატივცემულობას გამოხატავს. ამის შესახებ ირაკლი კობახიძემ დღეს, იურიდიულ საკითხთა კომიტეტის სხდომის დასრულების შემდეგ, ჟურნალისტებთან საუბრისას განაცხადა:

"პირველი პრეცენდენტი შექმნა გიორგი მარგველაშვილმა, რომ ის არ ნიშნავს პარლამენტის რიგგარეშე სხდომას, რაც კონსტიტუციასთან არ არის შესაბამისობაში - ესეც შემიძლია, გითხრათ. კონსტიტუციაში წერია, რომ პრეზიდენტი რიგგარეშე სხდომას ნიშნავს პარლამენტის მოთხოვნით და მთავრობის წარდგინებით. წარდგინებასა და მოთხოვნას შორის ზუსტად ის განსხვავებაა, რომ ერთ შემთხვევაში, დისკრეცია აქვს პრეზიდენტს, მეორე შემთხვევაში, როცა პარლამენტის მოთხოვნაზეა საუბარი, იქ პრეზიდენტმა უნდა დანიშნოს რიგგარეშე სხდომა. შესაბამისად, სხდომის არ დანიშვნა არის კონსტიტუციასთან შეუსაბამო და ბუნებრივია, ეს ასევე არის პარლამენტის მიმართ უპატივცემულობის გამოხატულება. როცა პარლამენტი მოითხოვს რიგგარეშე სხდომის დანიშვნას, პრეზიდენტმა ეს სხდომა უნდა დანიშნოს. თუმცა, ამას მიჩვეული ვართ".

დღეს, 25 სექტემბერს გამართულ ბრიფინგზე მარგველაშვილის საპარლამენტო მდივანმა, ანა დოლიძემ განაცხადა, რომ საქართველოს პრეზიდენტმა რიგგარეშე სხდომა 26 სექტემბერს არ დანიშნა, რისი თხოვნითაც მას პარლამენტის თავმჯდომარემ, ირაკლი კობახიძემ მიმართა.

საპარლამენტო უმრავლესობას რიგგარეშე პლენარულ სხდომაზე საკონსტიტუციო ცვლილებების მესამე მოსმენით განხილვას გეგმავს. საქართველოს პარლამენტმა კონსტიტუციის პროექტი მეორე მოსმენით 23 ივნისს მიიღო. კენჭისყრას სულ 115 დეპუტატი ესწრებოდა, მათ სრულად დაუჭირეს მხარი საკონსტიტუციო ცვლილებებს. პროცესს ბოიკოტი გამოუცხადა ოპოზიციამ.