არასამთავრობო ორგანიზაციებმა ანტიკორუფციული ბიუროს მოთხოვნებთან დაკავშირებით გამართულ ბრიფინგზე განცხადება გააკეთეს. მათი თქმით, ბიუროს მოთხოვნა უკანონოა და სულ მცირე 10 კანონს მაინც არღვევს.

არასამთავრობოები აღნიშნავენ იმასაც, რომ არ აპირებენ იმ ადამიანების კონფიდენციალური ინფორმაციის გაცემას, რომლებსაც ეხმარებიან.

"ჩვენ, ქართული არასამთავრობო ორგანიზაციები, კვლავ ვაპროტესტებთ ივანიშვილი/კუპრაშვილის ანტიკორუფციული ბიუროს უკანონო მოთხოვნებს, რომელიც კლანურმა სასამართლომ მორჩილად დააკმაყოფილა.

2025 წლის ივნისში ივანიშვილ-კუპრაშვილის ბიურომ მურუსიძის სასამართლოს მეშვეობით მოგვთხოვა პერსონალური ინფორმაციის მიწოდება ჩვენი დაცვის ქვეშ მყოფი ადამიანების – წამების მსხვერპლების, ძალადობის მსხვერპლი ქალების, მოსწავლეების, სტუდენტების, მასწავლებლების, პენსიონერების, შშმ პირების, მეწარმეების, მამხილებლების, ჟურნალისტების, დამკვირვებლების, უკანონოდ გათავისუფლებული საჯარო მოხელეების შესახებ, ასევე ინფორმაცია ჩვენს საქმიანობასთან დაკავშირებით.
სააპელაციო სასამართლომ, რომლის თავმჯდომარე აშშ-ისა და ბრიტანეთისგან სანქცირებული ჩინჩალაძეა, ჩვენი საჩივარი არ დააკმაყოფილა და გადაწყვეტილება სულ ცოტა 10 კანონის დარღვევით გამოიტანა. მოთხოვნები, მათ შორის, ეწინააღმდეგება:

● საქართველოს კონსტიტუციას;

● პერსონალურ მონაცემთა დაცვის კანონმდებლობას;

● უფლებადამცველთა კონფიდენციალობის საერთაშორისო სტანდარტებს;

● ადამიანის უფლებათა ევროპულ კონვენციას და ევროპული სასამართლოს პრაქტიკას.

კიდევ ერთხელ ცალსახად ვაცხადებთ, არ ვაპირებთ ჩვენი მოქალაქეების ნდობის ღალატს. არავის მივცემთ წვდომას იმ ადამიანების კონფიდენციალურ ინფორმაციაზე, ვისაც ჩვენ დავხმარებივართ. ჩვენ ანგარიშვალდებული ვართ მოქალაქეების და არა ივანიშვილის მიმართ. ჩვენს საქმიანობასთან, ფინანსებთან, პროექტებთან და საერთაშორისო თანამშრომლობასთან დაკავშირებულ ინფორმაციას, რისი გასაჯაროებაც არ იკრძალება კონსტიტუციით და სხვა კანონმდებლობებით, შეუძლიათ გაეცნონ ჩვენს ვებ გვერდებსა და სოციალურ ქსელებში, ამიტომ, ჩვენ მათ დამატებით დოკუმენტებს არ გავუგზავნით.

თავისი რეპრესიული პოლიტიკის ფარგლებში ქართული სამოქალაქო საზოგადოებრივი ორგანიზაციების განადგურებას პუტინის რუსეთის მსგავსად ცდილობს. ეს ივანიშვილის ანტი-დასავლური პოლიტიკის ნაწილია, რომელიც ქვეყანაში დემოკრატიის მოშლას და საერთაშორისო პარტნიორებთან ურთიერთობების განადგურებას ემსახურება.
კიდევ ერთხელ ვაცხადებთ, რომ რუსული კანონებით ცხოვრებას არ ვაპირებთ და ვაგრძელებთ ბრძოლას ქართველი ხალხის უფლებების დასაცავად," — განაცხადეს არასამთავრობო ორგანიზაციებმა.

"სამოქალაქო საზოგადოების ფონდის" იურისტი საბა ბრაჭველი სოციალურ ქსელში განცხადებას აქვეყნებს და არასამთავრობო ორგანიზაციების განცხადებას აზიარებს.

"ჩინჩალაძის სააპელაციომ ძალაში დატოვა ბრძანება, რომლითაც პირადი მონაცემების გაცემა გვევალება. ნებისმიერი პასუხისმგებლობის ფასად, ამას არ გავაკეთებთ. ფინანსური ან საგრანტო ინფორმაცია თუ აინტერესებთ, შეიარონ ჩვენს საიტებზე, სადაც ყველაფერი დევს. ჩვენი ანგარიშვალდებულება არის საზოგადოებისადმი და არა ბიუროსადმი, ამიტომ ჩვენი საიტების დათვალიერების შეთავაზების გარდა, რაიმე დოკუმენტის გაგზავნას მათთვის არ ვაპირებთ," — დაწერა საბა ბრაჭველმა.