კვირას, სტამბოლში პოლიციამ LGBTQ+ თემის აკრძალული პრაიდის დემონსტრაციის ჩატარების მცდელობა ჩაშალა და 50-ზე მეტი ადამიანი დააკავა. ამის შესახებ ინფორმაციას Deutsche Welle ავრცელებს.

სტამბოლის პრაიდი თურქეთის ხელისუფლების მიერ 2015 წლიდან იკრძალება.

სტამბოლის გუბერნატორმა პრაიდის ჩატარება აკრძალა, მიზეზად კი დაასახელა, რომ ის "აზიანებს სოციალურ მშვიდობას, ოჯახურ სტრუქტურასა და მორალურ ღირებულებებს".

ქალაქის მნიშვნელოვან უბნებში პოლიციის დიდი რაოდენობით მობილიზება ხელს უშლიდა შეკრებებს. ცენტრში სამართალდამცავებსა და აქტივისტებს შორის, რომლებიც LGBTQ+ დროშებს აფრიალებდნენ, დაპირისპირება მოხდა.

ხალხის თანასწორობისა და დემოკრატიის პარტიის (DEM) ოპოზიციონერმა დეპუტატმა, კეზბან ქონუქჯუმ, რომელიც დემონსტრაციას დაესწრო, განაცხადა:
"სასახლის რეჟიმი ვერ შეინარჩუნებს ძალაუფლებას LGBTQ თემის დემონიზებით".

თურქეთში ჰომოსექსუალობა დანაშაული არ არის, თუმცა პრეზიდენტმა რეჯეფ თაიფ ერდოღანმა ბოლო ათწლეულში LGBTQ+ თემის მიმართ რიტორიკა კიდევ უფრო გაამკაცრა.

2025 წელი ერდოღანმა "ოჯახის წლად" გამოაცხადა და ქვეყანაში შობადობის დაბალ დონეს "ეგზისტენციური საფრთხე" უწოდა. მან LGBTQ+ მოძრაობა ტრადიციული ოჯახის წინააღმდეგ მართულ იდეოლოგიურ შეტევად შეაფასა:
"გენდერის განეიტრალების პოლიტიკის მთავარი მიზანი, სადაც LGBT გამოიყენება როგორც დარტყმის იარაღი, არის ოჯახი და ოჯახის ინსტიტუტის სიწმინდის ხელყოფა," — თქვა მან.

Human Rights Watch-მა და Amnesty International-მა აღნიშნეს, რომ მთავრობის მტრული რიტორიკა ზრდის დისკრიმინაციასა და ძალადობას LGBTQ+ ადამიანების წინააღმდეგ თურქეთში.