საქართველოს პრეზიდენტის, გიორგი მარგველაშვილის განცხადებით, ოკუპირებულ ტერიტორიაზე, საოკუპაციო ძალა მორიგ ვანდალურ ქმედებებს ახორციელებს, რაც როგორც საქართველოს ტერიტორიული მთლიანობის, ასევე ადამიანის ფუნდამენტური უფლებების წინააღმდეგაა მიმართული:

"ოკუპირებულ სოფელ ერედვში რუსეთის ფედერაციის დაფინანსებით ხდება დევნილი მოსახლეობის სახლების ნგრევა, რაც მიზნად ისახავს ქართული მოსახლეობის კვალის ამოშლას საქართველოს ამ ძირძველი ტერიტორიიდან. ეს არის 2008 წელს განხორციელებული ეთნიკური წმენდის პოლიტიკის გაგრძელება და ქმედება მიმართული ოკუპირებული ტერიტორიების ანექსიისაკენ. ეს არის დანაშაული მშვიდობიანი მოსახლეობის წინაშე, რომელსაც საერთაშორისო საზოგადოებამ უმკაცრესი შეფასება უნდა მისცეს".

ოკუპირებულ ტერიტორიაზე, სოფელ ერედვში, შენობა-ნაგებობებს ანგრევენ და ტერიტორიას ნანგრევებისგან წმენდენ. პროგრამის განსახორციელებლად რუსეთის მთავრობამ 4,2 მილიარდი რუბლი (70 მილიონი აშშ დოლარი) გამოყო.