სენატის საგარეო ურთიერთობათა კომიტეტის წევრი, დემოკრატი ჯინ შაჰინი და აშშ-ის "ჰელსინკის კომისიის" თავმჯდომარე, რესპუბლიკელი როჯერ უიკერიი ეხმაურებიან საქართველოს ანტიკორუფციული ბიუროს მიერ სამოქალაქო საზოგადოების ორგანიზაციებისგან მათი საქმიანობის შესახებ "საეჭვო საკანონმდებლო საფუძვლით" დეტალური ინფორმაციის მოთხოვნას.

ამერიკელი სენატორები აცხადებენ, რომ ქართული ოცნების მთავრობა მოქმედებს "აგრესიულად ძალაუფლების კონსოლიდაციისთვის, რაც ლუკაშენკას რეჟიმს მოგვაგონებს".

მათი განცხადებით, "დემოკრატიული მთავრობები საფრთხედ არ უნდა აღიქვამდნენ დამოუკიდებელი მედიის მხარდამჭერ, კრემლის პროპაგანდასთან მებრძოლ, კორუფციასთან მებრძოლ და ქალებისა და ახალგაზრდობის მხარდამჭერ ორგანიზაციებს".

განცხადება სენატორებმა გუშინ, 25 ივნისს გააკეთეს.

"ქართული ოცნების მთავრობა აგრესიულად ცდილობს ძალაუფლების კონსოლიდაციას და ახშობს დამოუკიდებელი ხმებს ანტიდემოკრატიული ქმედებებით, რაც ბელარუსში ლუკაშენკოს რეჟიმს მოგვაგონებს. სამოქალაქო საზოგადოებისგან მოთხოვნილი ინფორმაცია ერთი მხრივ, უკანონოდ ჩანს, თუმცა აგრეთვე იმდენად მოცულობითია, რომ დანამდვილებით გამოიწვევს ამ მოთხოვნასთან შეუსაბამობას. ქართული ოცნების ქმედებები, რომლებიც, როგორც ჩანს, ოლიგარქ ბიძინა ივანიშვილის მიერ არის მართული, მიზნად ისახავს ისეთი ჯგუფების მუშაობის პარალიზებას, როგორიცაა სამოქალაქო საზოგადოების ფონდი, ეკონომიკური პოლიტიკის კვლევის ცენტრი, საერთაშორისო გამჭვირვალობა — საქართველო, საფარი, მომავლის აკადემია, მედიის განვითარების ფონდი და "სამართლიანი არჩევნებისა და დემოკრატიის საერთაშორისო საზოგადოება (ISFED)". ამავდროულად, მიმდინარე კვირაში ქართულმა ოცნებამ გააძლიერა თავდასხმა პოლიტიკურ ოპოზიციაზე, დააპატიმრა და პოლიტიკურად მოტივირებული ბრალდებების საფუძველზე განაჩენი გამოუტანა რამდენიმე პროდემოკრატიულ ლიდერს.

მარტივად რომ ითქვას, დემოკრატიული მთავრობები საფრთხედ არ უნდა აღიქვამდნენ დამოუკიდებელი მედიის მხარდამჭერ, კრემლის პროპაგანდასთან მებრძოლ, კორუფციასთან მებრძოლ და ქალებისა და ახალგაზრდობის მხარდამჭერ ორგანიზაციებს. როგორც ეს ჯგუფები დაიცავენ საქართველოს მოქალაქეებისა და მამხილებლების პერსონალურ ინფორმაციას ხელისუფლების წვდომისგან, ზუსტად ისე გამოვიყენებთ ჩვენს ხმასა და კანონმდებლობას მათ გვერდით დგომისთვის. ამისთვის, მხარს ვუჭერთ ორპარტიული "MEGOBARI აქტის" წინსვლას მაქსიმალურად მალე, რის საშუალებასაც სენატის კალენდარი მოგვცემს" — ნათქვამია განცხადებაში.

მეტი "MEGOBARI აქტის" შესახებ: