ტელეკომპანია რუსთავი 2 ახალ გადაცემაზე მუშაობს, რომელიც უმცირესობებზე, ძირითადად კი ლგბტ ადამიანებზე იქნება. აღნიშნულ გადაცემას ღიად გეი და ლესბოსელი წამყვანები ეყოლება. ამის შესახებ On.ge-ს რუსთავი 2-ის გენერალურმა დირექტორმა, ნიკა გვარამიამ უთხრა.

გვარამიას თქმით, გადაცემის ფორმატი შემეცნებითი ტოქ-შოუა, რომელიც ადამიანებს გასართობ ფორმატში მიაწვდის ინფორმაციას:

"ჩვენ მიგვაჩნია, რომ ეს თემა და ნებისმიერ სხვა თემა გაცილებით უფრო მნიშვნელოვანია და ეფექტურია, როდესაც მიწოდებულია მაყურებლისთვის ამ ფორმატში და არა ლექციის და უფლებების მშრალად წაკითხვის ფორმატში. მიგვაჩნია, რომ მოვიდა დრო, ამაზე ვისაუბროთ ღიად, გახსნილად, მათ შორის, წამყვანებმა პირველ რიგში."

გვარამიას განმარტებით, გადაცემა შეიძლება მიეძღვნას სხვადასხვა უმცირესობების წარმომადგენლებს, მათ შორის რელიგიურს თუ ეთნიკურს, ასევე, შშმ პირებს. ამასთან, გვარამიას თქმით, მთავარი აქცენტი გაკეთებული იქნება გენდერულ საკითხებზე.

რაც შეეხება სხვა წამყვანებს, ნიკა გვარამია ამბობს, რომ ამაზე მუშაობა მიმდინარეობს და ჯერჯერობით, გადაწყვეტილება მხოლოდ ღიად გეი და ლესბოსელ წამყვანების შერჩევაზეა მიღებული.