ქართული ოცნების აღმასრულებელმა მდივანი მამუკა მდინარაძე "თანაინვესტირების ფონდის" ყოფილი ხელმძღვანელის და ამჟამად პატიმრობაში მყოფი ბიზნესმენის, გიორგი ბაჩიაშვილის განცხადებას გამოეხმაურა იმასთან დაკავშირებით, რომ მისი "გატაცება" ბიძინა ივანიშვილის დაკვეთა იყო და სუს-ის უფროსი ანრი ოხანაშვილი იმ ბორტზე იმყოფებოდა, რომლითაც "მოიტაცეს".

"მე ყველას ძალიან გთხოვთ, არ უარყოთ ეს ვერსია თუ შეიძლება, ეს სუს-ის პრესტიჟს ერთიორად ამაღლებს...ამ ვერსიის თანახმად, ანრი ოხანაშვილმა პირადად ჩაატარა სხვა ქვეყანაში სპეცოპერაცია და ამის შედეგად საქართველოს მსჯავრდადებული წამოიყვანა სხვა ქვეყნიდან. ასეთი ოპერაციების შესახებ კინოებში გვინახავს, გაგვიგია და დიდი ინტერესით გვიყურებია, ამიტომ, მოდით, არ უარვყოთ ეს ვერსია და არ ვთქვათ, რომ ეს ასე არ იყო. კიდევ უფრო სერიოზულად თუ მკითხავთ, მე როგორც ვიცი, გამოძიებას მიმართა და ბუნებრივია, არსებობს ვალდებულება, ასეთი საკითხები დეტალურად იქნას გამოძიებული, მათ შორის, მისი დაკავების დეტალები.თუმცა, მე წინააღმდეგობას მის მიერ გახმოვანებული ვერსიის მიმართ არ დავაფიქსირებ, მხოლოდ იმიტომ, რომ ძალიან მომწონს"— განაცხადა მამუკა მდინარაძემ.