საქართველოს მე-5 პრეზიდენტმა, სალომე ზურაბიშვილმა დღეს გამართულ ბრიფინგზე თვითმმართველობის არჩევნებში მონაწილეობა-არმონაწილეობაზე ისაუბრა. მისი თქმით, "მაშინ, როცა პოლიტიკური ლიდერები ციხეში არიან, რანაირად შეიძლება ვილაპარაკოთ თავისუფალ არჩევნებზე?"

"კანონმდებლობის კუთხით, „საარჩევნო კოდექსში“ შეტანილი ცვლილებები არათუ რამენაირად გამოასწორებს გაყალბებას, რაც წინა არჩევნებში იყო, არამედ უფრო დამძიმდა ეს. ცესკო ისეთივეა, როგორც იყო. დამკვირვებლების უფლებები კიდევ უფრო შეიზღუდა. ისიც უნდა ვიცოდეთ, რომ ადგილობრივ არჩევნებზე დასაკვირვებლად საერთაშორისო დამკვირვებლებიც იშვიათად მოდიან. ცხადია, ადგილობრივ არჩევნებში დიასპორა არ იღებს მონაწილეობას. ამ პირობებში, ვინმეს თუ აქვს რაიმეს იმედი ადგილობრივ არჩევნებში მონაწილეობით, მე ვერ ვხედავ, არ მესმის, შეიძლება რაღაც არ ვიცი. ვერ ვხედავ როგორ შეიძლება ამან გამარჯვება მოიტანოს და არ მოიტანოს იმედგაცრუება იმ საზოგადოებაში, რომელიც იბრძვის ამდენი თვეა, იმ ადამიანებში, რომლებიც არიან ციხეში. როგორ შეიძლება შეხვიდე არჩევნებში, როცა პოლიტპატიმრები არა მხოლოდ აქტივისტები არიან, არამედ პოლიტიკური ლიდერები. პოლიტიკური ლიდერები თუ ციხეში არიან, რანაირად შეიძლება ვილაპარაკოთ თავისუფალ არჩევნებზე?", — დასძინა სალომე ზურაბიშვილმა.

მისი თქმით, ქვეყანაში საჯარო სივრცის შოვნაც პრობლემაა. მისი თქმით, რუსთაველზე გავლაც "საკმაოდ ძვირად ღირებული გასეირნება გამოდის".

"ვინმემ მითხრას სად არის საჯარო სივრცეები, თბილისშიც კი ძნელი მოსაპოვებელია საჯარო სივრცე.... რუსთაველზე თუ გაივლი, გაისეირნებ, ეს საკმაოდ ძვირად ღირებული გასეირნება გამოდის. და სხვა საჯარო და თუნდაც კერძო სივრცეები, დღევანდელი კანონმდებლობით, იმისთვის რომ დაიქირაო დიდი დარბაზი და ყველა არჩევნებს სჭირდება წინასწარ შეკრებები, უნდა მოიპოვო ნებართვა. საჯარო სივრცეები, რომელიც მუნიციპალიტეტებს ეკუთვნით, ის ხომ საერთოდ მიუწვდომელია და იქნება ოპოზიციური პარტიებისთვის”, - აღნიშნა სალომე ზურაბიშვილმა და დასძინა, რომ ცესკო ისეთივეა, როგორიც იყო.

ამას გარდა, ზურაბიშვილმა თქვა, რომ ოცნების ხელისუფლების მხრიდან მძიმე წნეხის ქვეშაა მედია და არც სასამართლოსადმი ნდობა გაზრდილა.