თბილისის მერი დავით ნარმაინია ამბობს, რომ დღევანდელი მერია C.T. Park-თან მოლაპარაკებით ვერაფერს გახდა, მაგრამ მიესალმება მომავალი მერი უფრო მკაცრ ზომებს თუ გაატარებს. C.T. Park-ის საკითხთან დაკავშირებით თბილისის მოქმედი მერის კომენტარს ინტერპრესნიუსი აქვეყნებს.

"C.T. Park-თან ჩემი დამოკიდებულება ყველასთვის ცნობილია - ეს არის მკვეთრად უარყოფითი დამოკიდებულება მათი საქმიანობის და მტაცებლური პოლიტიკის მიმართ. ბუნებრივია, მკაცრი ზომები უნდა იქნას გატარებული, თუმცა გასათვალისწინებელია ისიც, რომ C.T. Park-თან გაფორმებულია ძალიან კაბალური ხელშეკრულება", - განაცხადა ნარმანიამ.

თბილისის მერობის კანდიდატმა მმართველი პარტიიდან, ქართული ოცნებიდან კახა კალაძემ 18 სექტემბერს თბილისის სატრანსპორტო გეგმის პრეზენტაციისას განაცხადა, რომ როგორც კი მერიაში შევა, მაშინვე დასრულდება ის უმსგავსობა, რაც პარკირებასთან დაკავშირებით ქალაქში ხდება.