19 მაისს, ისრაელმა ღაზაში საკვები პროდუქტების შეტანაზე 11-კვირიანი ბლოკადა შეამსუბუქა, თუმცა გაერო აცხადებს, რომ ბოლო კვირაში შეყვანილი დახმარება მოსახლეობის საჭიროებების მხოლოდ 10%-ს ფარავს. გაეროს პალესტინელი ლტოლვილების სააგენტოს ხელმძღვანელმა აღნიშნა, რომ გასულ კვირაში ღაზაში გაგზავნილი 900 სატვირთო მანქანა მოსახლეობის ყოველდღიური საჭიროებების მხოლოდ 10%-ს ფარავს.

გაეროს მხარდაჭერით ჩატარებულმა შეფასებამ აჩვენა, რომ ღაზას მთელი მოსახლეობა კრიტიკულ შიმშილის საფრთხეშია, ხოლო გაეროს მსოფლიო სასურსათო პროგრამის (WFP) წარმომადგენელმა აღნიშნა, რომ 11-კვირიანი ჰუმანიტარული ბლოკადის შემდეგ, ორი მილიონი ადამიანი შიმშილის რისკის წინაშეა.

WFP-ის ინფორმაციით, 31 მაისს ღაზაში ფქვილით დატვირთული 77 სატვირთო მანქანა შევიდა. თუმცა, გზაზე ყველა სატვირთო მანქანა შეჩერდა, რადგან მშიერი მოსახლეობა საკვების მოპოვებას ადგილზევე ცდილობდა, რის შემდეგაც ორგანიზაციამ მიიღო გადაწყვეტილება, ხალხს დახმარება პირდაპირ გზაზე მიეღო. ისინი მოსახლეობას სთხოვდნენ, რომ თითოს მხოლოდ ერთი ტომარა აეღო, მაგრამ იმის გაკონტროლება მაინც ვერ შეძლეს, ვინ რამდენს იღებდა.

WFP-მ აღნიშნა, რომ თითქმის 80-დღიანი სრული ბლოკადის შემდეგ, მშიერი ადამიანები არ მისცემდნენ საშუალებას, რომ საკვებით სავსე სატვირთო მანქანები თავისუფლად გადაადგილებულიყვნენ.

თავდასხმა რაფაჰში მდებარე ჰუმანიტარული დახმარების გამანაწილებელ ცენტრზე

გუშინ, 1-ელ ივნისს, ღაზას სამხრეთით, რაფაჰში მდებარე ჰუმანიტარული დახმარების გამანაწილებელ ცენტრზე თავდასხმის შედეგად, სულ მცირე 31 ადამიანი დაიღუპა და 100-ზე მეტი დაშავდა — აცხადებს ჰამასის ჯანდაცვის სამინისტრო BBC-თან საუბრისას.

მათივე ცნობით, ისრაელის ტანკებმა ჰუმანიტარული დახმარების ცენტრთან ახლოს ცეცხლი გახსნეს და სწორედ ამას მოჰყვა მსხვერპლი.

წითელი ჯვრის საერთაშორისო კომიტეტმა (ICRC) Reuters-თან განაცხადა, რომ მათ საველე ჰოსპიტალს რაფაჰში 179 დაშავებული მიიყვანეს.

"ყველა პაციენტი ამბობდა, რომ ჰუმანიტარულ დახმარების განაწილების პუნქტში მოხვედრას ცდილობდა. ეს არის ყველაზე მაღალი რაოდენობა იარაღით დაჭრილი ადამიანებისა ერთ შემთხვევაში მას შემდეგ, რაც წელიწადზე მეტი ხნის წინ საველე ჰოსპიტალი გაიხსნა ," — ნათქვამია ICRC-ის განცხადებაში.

ისრაელის სამხედრო ძალების განცხადებით, წინასწარი გამოძიებით დადგინდა, რომ ისრაელის ჯარებმა "მშვიდობიან მოქალაქეებისთვის ცეცხლი მაშინ არ გაუხსნიათ, როცა ისინი დახმარების ცენტრთან ახლოს ან მის შიგნით იმყოფებოდნენ".

ღაზას ჯანდაცვის სამინისტროს მიხედვით, მიმდინარე ომის შედეგად უკვე დაიღუპა სულ მცირე 54 418 ადამიანი.