"თანაინვესტირების ფონდის" ყოფილი ხელმძღვანელი გიორგი ბაჩიაშვილი მისი "გატაცების" და საქართველოში "უკანონო გზით" ჩამოყვანასთან დაკავშირებით გამოძიების დაწყებას ითხოვს. ამის შესახებ თბილისის საქალაქო სასამართლოში დღეს გამართულ პროცესზე განაცხადა.

მისი თქმით, საქართველოს მისი ექსტრადირებისთვის კანონიერი გზა არ ჰქონდა იმიტომ, რომ ინტერპოლის ძებნა იყო შეჩერებული. "საქართველოს წარმომადგენლებმა ბიძინა ივანიშვილს დავალებით მიმართეს ბანდიტურ გზას და ჩამომიყვანეს საქართველოში", — თქვა ბაჩიაშვილმა.

"აბსოლუტურად უდანაშაულოდ ვთვლი თავს ყველა სისხლის დანაშაულის საქმეზე. არანაირად არ ვარ დამნაშავე არც ერთ სისხლის სამართლის საქმეზე. დღეს მე ვარ ივანიშვილის პირადი პატიმარი. დღეს ახალი საერთაშორისო დანაშაულის შესახებ მინდა შეგატყობინოთ, რომელიც პირდაპირ ივანიშვილის დაკვეთით მოხდა.

შაბათს, 24 მაისს, მე გამიტაცეს საზღვარგარეთიდან, თვალები ამიხვიეს, ადვოკატის, პროკურორის, მოსამართლის, ოჯახის შეტყობინების და დაკავშირების გარეშე. შემდეგ მოტაცებული ჩამტენეს "აირზენას" თვითმფრინავში და ყველანაირი ახსნა-განმარტების გარეშე, ყველა კანონის დარღვევით ჩამომიყვანეს საქართველოში.

...დანაშაულებრივმა ჯგუფმა, რომელიც დღეს საქართველოს მთავრობას უწოდებს თავის თავს, ნამდვილად აჯობა თავის თავს. არ ვიცი რა ტყუილები გააცნეს სხვა სახელმწიფოს, რასაც მოჰყვა ასეთი მოქმედება ჩემს წინააღმდეგ. დიდ შეცდომაში შეიყვანეს. საქართველოს არ ჰქონდა კანონიერი გზა ჩემი ექსტრადირების. იმიტომ, რომ ინტერპოლის ძებნა იყო შეჩერებული ჩემი ადვოკატების მიმართვის შედეგად. ინტერპოლს არ გაუჭირდა დაედგინა, რომ ჩემი სისხლის სამართლებრივი დევნა არის პოლიტიკური. საქართველოს წარმომადგენლებმა ბიძინა ივანიშვილს დავალებით მიმართეს ბანდიტურ გზას და ჩამომიყვანეს საქართველოში. გთოვთ, ეს ჩემი განცხადება მიიღოთ ახალი გამოძიების დასაწყებად", — თქვა ბაჩიაშვილმა.

შეგახსენებთ, რომ 27 მაისს სახელმწიფო უსაფრთხოების სამსახურმა გაავრცელა ინფორმაცია, რომ გიორგი ბაჩიაშვილი დააკავეს.

"2025 წლის 26 მაისს განხორციელებული ანონიმური შეტყობინებით ცნობილი გახდა, რომ წითელი ხიდისა და სადახლოს შორის არსებული ე.წ. მწვანე საზღვრის მონაკვეთის მიმდებარედ გადაადგილდებოდა წითელი ცირკულარით ძებნილი და მსჯავრდებული საქართველოსა და რუსეთის ფედერაციის ორმაგი მოქალაქე გიორგი ბაჩიაშვილი.

გატარებული საგამოძიებო და ოპერატიულ-სამძებრო ღონისძიებების შედეგად ზემოაღნიშნული პირი დაკავებულ იქნა", — ნათქვამია სუს-ის განცხადებაში.

შეგახსენებთ, 4 მარტს გიორგი ბაჩიაშვილმა დაწერა, რომ საქართველოდან იძულებით წავიდა.

თანაინვესტირების ფონდის ყოფილი დირექტორს ბრალი საერთო ჯამში სისხლის სამართლის 3 საქმეზე აქვს წარდგენილი.

მას თავდაპირველად ბრალი ქართული ოცნების დამფუძნებლის, ბიძინა ივანიშვილის კუთვნილი კრიპტოვალუტის მითვისების გამო წარუდგინეს.

პროკურატურის ინფორმაციით, მან 43 მილიონამდე აშშ დოლარის ღირებულების ბიტკოინი მართლსაწინააღმდეგოდ მიითვისა. ბაჩიაშვილს აღკვეთის ღონისძიების სახით 2 500 000-ლარიანი გირაო ჰქონდა შეფარდებული, თუმცა, ამ საქმეზე, მას გირაო პატიმრობით შეეცვალა.

გიორგი ბაჩიაშვილს კიდევ ერთი ბრალი "მტკვარი ჰესის" საქმეზე აქვს. კერძოდ — სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობაზე ან არაჯეროვნად შესრულებაზე. აღნიშნულ საქმეზეც მას აღკვეთის ღონისძიების სახით შეფარდებული 50 000-ლარიანი გირაო პატიმრობით შეეცვალა.

ბაჩიაშვილს პატიმრობა აქვს შეფარდებული, ასევე, საქართველოს სახელმწიფო საზღვრის უკანონო კვეთის საქმეზეც.