დღეს, 27 მაისს სახელმწიფო უსაფრთხოების სამსახურმა გაავრცელა ინფორმაცია და ფოტომასალა თანაინვესტირების ფონდის ყოფილი დირექტორის, გიორგი ბაჩიაშვილის დაკავების შესახებ.

დაკავებამდე ერთი დღით ადრე, The Guardian-მა ბაჩიაშვილთან ჩაწერილი ინტერვიუ გამოაქვეყნა. სადაც ის აცხადებს, რომ ორი ქვეყნის სპეცსამსახურების ცნობით, მისი მკვლელობის ბრძანებაა გაცემული.

სტატიას ასეთი სათაური აქვს: "ვიცოდი, რომ ციხეში მოვკვდებოდი — როგორ აღმოჩნდა მიმალვაში საქართველოს დე-ფაქტო მმართველის მარჯვენა ხელი".

The Guardian-ის პუბლიკაციაში ბაჩიაშვილი აცხადებს, რომ მისი მკვლელობის ბრძანება ბიძინა ივანიშვილის გაცემული არაა.

"[ერთ-ერთი ქვეყნის სპეცსამსახურებმა] მითხრეს, რომ განა უბრალოდ რისკს ხედავენ, არამედ იციან, რომ ეს [ჩემი მკვლელობის] ბრძანება გაცემულია", — ამბობს ბაჩიაშვილი.

იგი ასევე ვარაუდობს, რომ ამის უკან ბიძინა ივანიშვილი არ დგას:

"ვშიშობ, ეს [ბრძანება] შეიძლება მოდიოდეს საიდუმლო სამსახურებისგან ან რომელიმე ქვეყნის გარკვეული ძალებისგან, რომელთაც სურთ ივანიშვილის უფრო დასუსტება. თუ მას მკვლელობას „შეტენიან“, მაშინ გაცილებით ნაკლები შანსი იქნება იმისა, რომ ივანიშვილს აშშ-სთან ნორმალური დიალოგი ჰქონდეს, ან ის უფრო მეტად წამოეგება ანკესზე", — უთხრა მან ბრიტანულ გამოცემას (რადიო თავისუფლებას თარგმანი).

როგორც რადიოა თავისუფლება The Guardian-ზე დაყრდნობით წერს, ბაჩიაშვილს საქართველოში ბრალის წაყენების შემდეგ ჩამოართვეს როგორც საქართველოს, ისე რუსეთის პასპორტი, თუმცა რუსულ პასპორტს ვადა გაუვიდა, რამაც მას რუსეთში ამ პასპორტის ჩუმად განახლების შესაძლებლობა მისცა.

სომხეთიდან ის კატარში გაფრინდა, ხოლო კატარიდან სად გაემგზავრა, უცნობია. არც The Guardian წერს, სად შეხვდნენ ჟურნალისტი და ფოტოგრაფი ბაჩიაშვილს, რის მიზეზადაც ბაჩიაშვილის თხოვნას ასახელებს "უსაფრთხოების რისკებიდან გამომდინარე".

რაც შეეხება გაქცევის ახალ დეტალებს, თვეების განმავლობაში ის კახეთში მოგზაურობდა, რითაც მასზე მოთვალთვალე სპეცსამსახურებს არწმუნებდა, რომ ეს მისი ჩვეული რუტინა იყო;
2 მარტს მან მძღოლსა და დაცვის წევრს უთხრა, რომ სურდა კახეთში წასვლა, თუმცა შუა გზაში მანქანიდან ჩამოვიდოდა ჟურნალისტთან შეხვედრის მიზნით — ერთი-ერთზე, საიდუმლოდ;
"მანქანიდან ჩამოვხტი, "კუდი" საკმაოდ შორს იყო, კუთხის უკან, შენობა გავიარე და ჩავჯექი მანქანაში, რომელიც იქ მელოდებოდა", — ამბობს ბაჩიაშვილი;
მისი თქმითვე, მობილური ტელეფონი იმ ავტომობილში, ჩანთაში დატოვა, რომ ამგვარად აერია კვალი. სავარაუდოდ, ამის შემდეგ გაემართა ის "ტოიოტა ქამრით", მანქანაში მოწყობილი სამალავით, სომხეთის საზღვრისაკენ, — წერს რადიო თავისუფლება.

ბაჩიაშვილი The Guardian-თან ამბობს, რომ ივანიშვილი საკუთარი მოკვდაობითაა შეპყრობილი და ხეებს სასიცოცხლო ენერგიის წყაროდ მიიჩნევს.

"იგი ატარებს უამრავ ექსპერიმენტულ, გიჟურ პროცედურას, როგორიცაა ღეროვანი უჯრედების გადანერგვა და ეს "ვუდუს". ერთი ასეთი "ვუდუ ოსტატი", იულია კრუშანოვა, მასთან ცხოვრობს", — ამბობს ბაჩიაშვილი.

The Guardian წერს, რომ კრუშანოვა საკუთარ თავს "დაბერების საწინააღმდეგო მედიცინის სპეციალისტს" უწოდებს. ივანიშვილის ადვოკატი კი უარყოფს, რომ კრუშანოვა ივანიშვილთან ცხოვრება:

"ბაჩიაშვილის ეს განცხადებები აბსურდულია. გარწმუნებთ, არანაირი ექიმი მასთან არ ცხოვრობს, მით უმეტეს რაღაც "ოკულტური" გადახრებით და არანაირი ექსპერიმენტები არ ტარდება", — ამბობს ადვოკატი.

მიმდინარე წლის 23 აპრილს გიორგი ბაჩიაშვილის ადვოკატებმა გაავრცელეს განცხადება იმის შესახებ, რომ ორ უცხოურ სადაზვერვო სააგენტოსგან აქვს ინფორმაცია, რომ გიორგი ბაჩიაშვილის სიცოცხლის მოსპობის რეალური საფრთხე არსებობს.

მათ მიერ გავრცელებულ განცხადებაში ნათქვამია, რომ მოცემული საფრთხის გათვალისწინებით, იურიდიულ ჯგუფს არ დარჩა სხვა გზა გარდა იმისა, რომ გაავრცელონ შესაბამისი განცხადება საჯაროდ და მოუწოდონ საერთაშორისო სამართალდამცავ უწყებებს, დაიცვან გიორგი ბაჩიაშვილის უსაფრთხოება და გამოიძიონ საქმეზე პასუხისმგებელი პირები.

"ჩვენი დაცვის ქვეშ მყოფი პირის სახიფათო სიტუაციიდან გამომდინარე, ბატონ ამსტერდამს იურიდიულ გუნდს სხვა გზა არ აქვს, გარდა იმისა, რომ ეს განცხადება გაავრცელოს და მოუწოდოს სამართალდამცავ ორგანოებს საერთაშორისო დონეზე, უზრუნველყონ ბატონი ბაჩიაშვილის დაცვა და გამოიძიონ ისინი, ვინც ამ სავარაუდო შეთქმულების უკან დგანან," — ნათქვამი იყო განცხადებაში.

გიორგი ბაჩიაშვილის ადვოკატი, რობერტ ამსტერდამი აცხადებდა, რომ მკვლელობის შეთქმულება შესაძლოა დაკავშირებული იყოს "გარე ძალებთან, რომელთაც სურთ საქართველოში არსებული მდგომარეობის კიდევ უფრო არევა".

"ჩვენ გვჯერა, რომ საქართველოს ხელისუფლება მზად არის გამოიყენოს ნებისმიერი გზა ყველა სერიოზული პოლიტიკური ოპონენტისა და რეჟიმის კრიტიკოსის გასანადგურებლად," — განაცხადა რობერტ ამსტერდამმა.

შეგახსენებთ, 4 მარტს გიორგი ბაჩიაშვილმა დაწერა, რომ საქართველოდან იძულებით წავიდა.

თანაინვესტირების ფონდის ყოფილი დირექტორს ბრალი საერთო ჯამში სისხლის სამართლის 3 საქმეზე აქვს წარდგენილი.

მას თავდაპირველად ბრალი ქართული ოცნების დამფუძნებლის, ბიძინა ივანიშვილის კუთვნილი კრიპტოვალუტის მითვისების გამო წარუდგინეს.

პროკურატურის ინფორმაციით, მან 43 მილიონამდე აშშ დოლარის ღირებულების ბიტკოინი მართლსაწინააღმდეგოდ მიითვისა. ბაჩიაშვილს აღკვეთის ღონისძიების სახით 2 500 000-ლარიანი გირაო ჰქონდა შეფარდებული, თუმცა, ამ საქმეზე, მას გირაო პატიმრობით შეეცვალა.

გიორგი ბაჩიაშვილს კიდევ ერთი ბრალი "მტკვარი ჰესის" საქმეზე აქვს. კერძოდ — სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობაზე ან არაჯეროვნად შესრულებაზე. აღნიშნულ საქმეზეც მას აღკვეთის ღონისძიების სახით შეფარდებული 50 000-ლარიანი გირაო პატიმრობით შეეცვალა.

ბაჩიაშვილს პატიმრობა აქვს შეფარდებული, ასევე, საქართველოს სახელმწიფო საზღვრის უკანონო კვეთის საქმეზეც.