29 სექტემბერს, 21 საათზე, ბორის პაიჭაძის სახელობის დინამო არენაზე საქველმოქმედო მატჩი - მსოფლიოს ვარსკვლავები საქართველოსთვის გაიმართება. საქართველოს ფეხბურთის ფედერაციის ცნობით, ბილეთებიდან შემოსული თანხა ბორჯომის ტყის აღდგენით სამუშაოებს მოხმარდება.

აჭარასპროტის ცნობით, მატჩში მსოფლიო ფეხბურთის ლეგენდები ფრანჩესკო ტოტი, კარლეს პუიოლი, რივალდო, დიდა, ანდრეი შევჩენკო, ხავიერ ძანეტი, ზვონიმირ ბობანი, სერჟინიო, პაოლო მალდინი, ლუკა ტონი, ერნან კრესპო, ვინსენტ კანდელა, მარეკ იანკულოვსკი, ალესანდრო კოსტაკურტა, დემეტრიო ალბერტინი, დინო ბაჯო, მასიმო ამბროზინი, მასიმო ოდო, მარკო დელვეკიო, სებასტიან ფრეი, ანჯელო დი ლივიო, ენრიკო ანონი, კრისტიან აბიატი, სებასტიანო როსი, ჯუზეპე ფავალი, მაურო ტასოტი, ანჯელო კარბონე, ივან კორდობა, დარიო შიმიჩი, იბრაჰიმ ბა და პიეტრო ვერხოვოდი მიიღებენ მონაწილეობას.

ბილეთების გაყიდვა ონლაინ რეჟიმში www.tkt.ge-ზე 19 სექტემბერს, 15:00 საათზე დაიწყება და მისი ძირითადი ნაწილის ფასი 5 ლარი იქნება, თუმცა გაიყიდება 10, 15 და 25 ლარიანი ბილეთებიც.