"საქართველოში, ქვეყნის დამოუკიდებლობის მანძილზე, სიტყვისა და გამოხატვის თავისუფლება უმაღლეს ნიშნულზეა", — ოცნების დეპუტატი დავით მათიკაშვილი ბრიტანეთის ელჩის, გარეტ უორდის განცხადებას გამოეხმაურა, სადაც ის ამბობს, რომ დიდი ბრიტანეთი შეშფოთებულია ჟურნალისტების შეურაცხყოფის ფაქტებითა და თავისუფალი მედიის შეზღუდვით საქართველოში.

"ბრიტანეთის ელჩისგან ასეთი დამოკიდებულება ღიმილის მომგვრელია. ჩვენმა ქვეყანამ მედია საშუალებების მარეგულირებელ სივრცედ სწორედ ბრიტანული მოდელი, ე.წ. BBC-ს მოდელი მიიღო.

საქართველოში, ქვეყნის დამოუკიდებლობის მანძილზე სიტყვისა და გამოხატვის თავისუფლება უმაღლეს ნიშნულზეა. ხდება შემოტევა იქ, რაც არის ჩვენი წარმატების გამორჩეული ნიშანი.

ის, რომ კონკრეტული ტელეკომპანიების ბულინგზე ევროპული ქვეყნების ელჩები არც რეაგირებენ, ხაზს უსვამს ორმაგ სტანდარტს, რაც ევროპის კონტინენტზეა", — განაცხადა დავით მათიკაშვილმა.