"რატომ არ ახსენა ირაკლი კობახიძემ 9 აპრილთან დაკავშირებულ განცხადებაში საბჭოთა კავშირი?" — ეს კითხვა ოცნების ხელისუფლების პრემიერმინისტრ ირაკლი კობახიძეს „რუსთავი 2-ის" გადაცემაში "ღამის კურიერის" წამყვანმა ნინო შუბლაძემ დაუსვა.

კობახიძემ განმარტა, რომ იმ ადამიანებს შორის, რომლებმაც 9 აპრილის დემონსტრაცია დაარბიეს რუსების გარდა, სხვა საბჭოთა რესპუბლიკების წარმომადგენლებიც იყვნენ, მათ შორის უკრაინელები, ბალტიისპირელები, შუა აზიელები და ა.შ.

"რატომ არ იყო სიტყვა რუსული ნახსენები? — გასაგებია, რომ ეს არ იყო, როგორც ასეთი, რუსული ჯარი, ეს იყო საბჭოთა არმია და ესენი იყვნენ საბჭოთა ჯარისკაცები. იმ ადამიანებს შორის, რომლებმაც 9 აპრილის დემონსტრაცია დაარბიეს და ადამიანები მოკლეს, იყვნენ რუსების გარდა, სხვა საბჭოთა რესპუბლიკების წარმომადგენლებიც. მათ შორის ისეთი რესპუბლიკების წარმომადგენლებიც, რომლებიც დღეს მიიჩნევიან ცივილიზებული სამყაროს ნაწილად. იქ რუსების გარდა, იყვნენ უკრაინელები, ბალტიისპირელები, შუა აზიელები და ა.შ. — საბჭოთა კავშირი იყო...

მხოლოდ ლიბერალი შეიძლება აჰყვეს ასეთ რიტორიკას - თუ არ გაქვს შეზღუდული გონება, ასეთ რაღაცას არ აჰყვები", — თქვა კობახიძემ.

შეგახსენებთ, რომ ქართული ოცნების პრემიერმინისტრმა, ირაკლი კობახიძემ 9 აპრილის განცხადებაში "უცხოური ძალა" 6-ჯერ ახსენა, რუსეთი — არც ერთხელ. კობახიძის განცხადებით, "9 აპრილის ტრაგედიიდან 36 წლის თავზე, კვლავაც უცხოური ძალა ძალადობს რუსთაველის გამზირზე. დღესაც, რუსთაველის გამზირზე უცხოური ძალა აღვივებს სიძულვილს, ცდილობს ხელოვნურად დაარღვიოს ერთიანობა ქართველებს შორის და ებრძვის თავისუფლების იდეას".

"9 აპრილი არის დღე, როდესაც უცხოურმა ძალამ განახორციელა ძალადობა ჩვენი თანამოქალაქეების წინააღმდეგ. ამავდროულად, 9 აპრილი არის დღე, რომელმაც გააერთიანა საქართველო, დღე როდესაც ქართველებს შორის სიყვარულმა სძლია სიძულვილს. 9 აპრილი, ასევე, არის დღე, როდესაც მონობაზე თავისუფლების იდეამ გაიმარჯვა. სწორედ ამიტომ, დღეს, როგორც არასდროს, უნდა გავემიჯნოთ ყოველგვარ ძალადობას, დავამარცხოთ სიძულვილი და დავიცვათ თავისუფლების იდეა.

დღეს, 9 აპრილის ტრაგედიიდან 36 წლის თავზე, კვლავაც უცხოური ძალა ძალადობს რუსთაველის გამზირზე. დღესაც, რუსთაველის გამზირზე უცხოური ძალა აღვივებს სიძულვილს, ცდილობს ხელოვნურად დაარღვიოს ერთიანობა ქართველებს შორის და ებრძვის თავისუფლების იდეას. თუმცა, 9 აპრილის გამოცდილებამ გვასწავლა, რომ უცხოური ძალის „არსება მოკლეა“ და სიძულვილსა და მონობაზე აუცილებლად სიყვარული და თავისუფლება გაიმარჯვებს.

დღეს, რუსთაველის გამზირზე უცხოურმა ძალამ სცადა ძალადობის პროვოცირება და როდესაც ამას ვერ მიაღწია, თავადვე იძალადა. ჩვენ ვერ მივცემთ სიძულვილს დამატებით ენერგიას და ჩვენს ქვეყანას ავარიდებთ უცხოური ძალის მიერ დაგეგმილ, თუნდაც მცირე, პროვოკაციას.

ვფიქრობთ, სწორედ ამას ელიან ჩვენგან 9 აპრილის გმირთა სულები, რომლებმაც სიყვარულისა და თავისუფლების იდეისთვის გაწირეს სიცოცხლე. მათ ხსოვნას ჩვენ დღეს სათანადო პატივს მივაგებთ. საქართველოში სიძულვილსა და მონობაზე სიყვარული და თავისუფლება გაიმარჯვებს!" — წერს "ოცნების" პრემიერი.