13 აპრილს, პარიზის წიგნის ფესტივალზე რეჟისორ მიხეილ კობახიძისადმი მიძღვნილი წიგნის "ცხოვრება კინო არ არის" პრეზენტაცია გაიმართა. წიგნის ავტორი რეჟისორი ნინო ხოფერიაა. წიგნთან ერთად ნინო ხოფერიამ სტუმრებს წარუდგინა დოკუმენტური ფილმი რეჟისორის ცხოვრებისა და შემოქმედების შესახებ.

მიხეილ კობახიძის შვილი, თინა კობახიძე, რეჟისორის შესახებ გამოცემული წიგნის ავტორს ღია წერილით მიმართავს და წერს, რომ "პარიზში წიგნის წარდგენა მიანდეს შუბლზე ძარღვგაწყვეტილი ადამიანების ჯგუფს" და "ეს წიგნი იმ ადამიანზეა, რომელიც სწორედ ასეთი რეჟიმის მსხვერპლი იყო!"

"ქალბატონო ნინო,

დარწმუნებული ვარ, თქვენი სურვილი, დაგეწერათ წიგნი მამაზე იყო სრულიად გულწრფელი და პატივისცემით სავსე. სამწუხაროდ, თქვენ არ გაითვალისწინეთ დღევანდელი უმძიმესი ვითარება საქართველოში.

მესმის, რომ ცხოვრება გრძელდება და ჩვენ ყველანი ჩვენს საქმეს ვაკეთებთ, მაგრამ არავის აქვს მორალური უფლება, არ გავითვალისწინოთ ის, რაც დღეს ქვეყანაში ხდება! სრულიად უდანაშაულო ახალგაზრდები თავისუფლების ბრძოლის გამო ციხეში არიან და მათი ცხოვრება დღევანდელი უმოწყალო დიქტატორული რეჟიმის ხელშია!

გუშინ, პარიზში წიგნის წარდგენა თქვენ მიანდეთ შუბლზე ძარღვგაწყვეტილი ადამიანების ჯგუფს.

პარიზის წიგნის გამოფენაზე მონაწილეობა არ მიიღეს ქართველმა მწერლებმა, რომლებმაც დაგმეს და გააპროტესტეს ის, რაც დღეს საქართველოში ხდება.

თქვენ არ გაითვალისწინეთ, რომ ეს წიგნი იმ ადამიანზეა, რომელიც სწორედ ასეთი რეჟიმის მსხვერპლი იყო!

დღეს, ისევ თავისუფლებისთვის ბრძოლას, ცენზურას, დიქტატურას ეწირება ჩვენი ახალგაზრდობა!

დღევანდელ ე.წ. კულტურის სამინისტროს არ გააჩნია არანაირი უფლება წარადგინოს წიგნი მიხელ კობახიძეზე არც პარიზში და არც არსად!" — წერს თინა კობახიძე.

კულტურის სამინისტრო სოციალურ ქსელში წერს, რომ მიხეილ კობახიძისადმი მიძღვნილი ფილმის ჩვენებას ოცნების ხელისუფლების კულტურის მინისტრის მოადგილე ბექა დავითულიანი, მიხეილ კობახიძის შვილი, საფრანგეთში მცხოვრები თეატრის მსახიობი ანა კობახიძე და სხვა სტუმრები დაესწრნენ.

პარიზის წიგნის ფესტივალი 11 აპრილს გაიხსნა და იქ ქართულ სტენდს მწერალთა სახლი და კულტურის სამინისტრო წარმოადგენენ.