აფგან სადიგოვის მიმართ ადამიანის უფლებათა ევროპული სასამართლოს მიერ მიღებული უმნიშვნელოვანესი გადაწყვეტილების შემდეგაც საქართველოს საერთო სასამართლოებმა აზერბაიჯანელი ჟურნალისტი უკანონოდ საექსტრადიციო პატიმრობაში დატოვეს. ამის შესახებ ინფორმაციას სოციალური სამართლიანობის ცენტრი (SJC) ავრცელებს.

მათი ცნობით, სასამართლოებმა გადაწყვეტილება ზეპირი განხილვის გარეშე მიიღეს და სოციალური სამართლიანობის ცენტრის სარჩელები აფგან საიდიგოვის საექსტრადიციო პატიმრობიდან გათავისუფლების შესახებ დასაშვებადაც კი არ ცნეს. საერთო სასამართლოების გადაწყვეტილებები აშკარად დაუსაბუთებელი და უკანონოა.

"თბილისის საქალაქო სასამართლომ ზეპირი განხილვის გარეშე შუამდგომლობა დაუშვებლად სცნო და აფგან სადიგოვი პატიმრობაში დატოვა. სასამართლოს გადაწყვეტილება ძალაში დატოვა თბილისის სააპელაციო სასამართლომ 17 მარტს, სადაც აღნიშნა, რომ ევროპული სასამართლოს გადაწყვეტილება არ წარმოადგენს ახალ გარემოებას, რომელიც შეიძლება გავლენა მოახდინოს აღკვეთის ღონისძიებაზე.

რაც შეეხება აფგან სადიგოვის ჯანმრთელობის მდგომარეობას, შიმშილობის შეწყვეტის შემდეგ მან დაიწყო საკვების მიღება, და მისი მდგომარეობა უმჯობესდება. მნიშვნელოვანია, რომ #18 სამედიცინო დაწესებულებამ გააგრძელოს ხანგრძლივი შიმშილობის შემდეგ მისი ჯანმრთელობის მდგომარეობის რეგულარული და სრულყოფილი შემოწმება და საჭიროების შემთხვევაში შესაბამისი მკურნალობა.

სოციალური სამართლიანობის ცენტრი მიიჩნევს, რომ სასამართლოს გადაწყვეტილებები დაუსაბუთებელია და ეწინააღმდეგება როგორც ეროვნულ, ისე საერთაშორისო სამართლის მოთხოვნებს", — ნათქვამია SJC-ს მიერ გავრცელებულ განცხადებაში.

აზერბაიჯანელი ჟურნალისტი, აფგან სადიგოვი საქართველოში 2024 წლის 3 აგვისტოს დააკავეს. 2025 წლის 31 იანვარს თბილისის საქალაქო სასამართლოს მოსამართლემ, ლელა მარიდაშვილმა, აფგან სადიგოვს საექსტრადიციო პატიმრობა დამატებით, 3 თვით 3 მაისამდე გაუხანგრძლივა.

აფგან სადიგოვს აზერბაიჯანში მიმდინარე გამოძიების საფუძველზე გამოძალვის ორ ეპიზოდს ედავებიან. შსს-ს ცნობით, სადიგოვი აზერბაიჯანის მიერ მუქარისა და გამოძალვის ფაქტებზე გათვალისწინებული დანაშაულისთვის იძებნებოდა. ოჯახი კი დაკავებას ილჰამ ალიევის ხელისუფლების მხრიდან პოლიტიკურ დევნას უკავშირებს.

სადიგოვი 12 სექტემბრიდან 161 დღე შიმშილობდა. 2025 წლის 14 იანვარს ადამიანის უფლებათა ევროპულმა სასამართლომ შუალედური გადაწყვეტილება მიიღო, რომლის მიხედვითაც აზერბაიჯანელი ჟურნალისტის აფგან სადიგოვის აზერბაიჯანში ექსტრადირება იკრძალება. ამის შემდეგ სადიგოვმა შიმშილბა შეწყვიტა.

SJC: სტრასბურგის სასამართლომ საქართველოს აფგან სადიგოვის აზერბაიჯანში ექსტრადიცია აუკრძალა. ჟურნალისტი [161-ე დღეს] შიმშილობას წყვეტს

აზერბაიჯანელი ჟურნალისტის პროტესტის მიზეზი მიგრაციის დეპარტამენტისგან თავშესაფრის მიღებაზე უარი იყო.

ამავე თემაზე:

SJC: აფგან სადიგოვი 159 დღეა, შიმშილობს, მისი ჯანმრთელობის მდგომარეობა კვლავ მძიმეა

აზერბაიჯანელი ჟურნალისტი აფგანს ადიგოვი მზია ამაღლობელს მხარდაჭერას უცხადებს

აფგან მუხთარლი: თუ აფგან სადიგოვი დაიღუპება, ამაზე პასუხისმგებელი ილჰამ ალიევი იქნება

სოციალური სამართლიანობის ცენტრი: აფგან სადიგოვის მდგომარეობა დამძიმდა და კრიტიკულია

SJC: 5 თებერვალს აფგან სადიგოვი რამდენიმე საათის განმავლობაში უგონო მდგომარეობაში იმყოფებოდა