ბრიუსელში ევროპული საბჭოს სპეციალური შეხვედრა იწყება, სადაც ევროკავშირის ლიდერები უკრაინის მხარდაჭერის გაგრძელებისა და ევროპის თავდაცვის საკითხებს განიხილავენ.

შეხვედრის დაწყებამდე უკრაინის პრეზიდენტმა, ვოლოდიმირ ზელენსკიმ ჟურნალისტებს განუცხადა, რომ მადლიერია მოწვევისთვის. მისი თქმით, გზავნილები თავდაცვითი შესაძლებლობების გაზრდისა და ევროპის უსაფრთხოების გაძლიერების ახალი პროგრამის შესახებ შესანიშნავი გადაწყვეტილებაა

"დიდი მადლობა ყველაფრისთვის და გზავნილები თავდაცვითი შესაძლებლობების გაზრდისა და ევროპის უსაფრთხოების გაძლიერების ახალი პროგრამის შესახებ შესანიშნავი გადაწყვეტილებაა", — აღნიშნა უკრაინის პრეზიდენტმა.

ევროკომისიის პრეზიდენტმა, ურსულა ფონ დერ ლაიენმა აღნიშნა, რომ ევროპა აშკარა საფრთხის წინაშე დგას და ამიტომ ევროპას საკუთარი თავის დაცვა უნდა შეეძლოს.

"ჩვენ უკრაინის გვერდით ვდგავართ იქამდე, სანამ ეს საჭირო იქნება. ეს ევროპისთვის გარდამტეხი მომენტია და უკრაინა, როგორც ჩვენი ევროპული ოჯახის ნაწილი, გარდატეხის წერტილია. ევროპა აშკარა საფრთხის წინაშე დგას და ამიტომ ევროპას საკუთარი თავის დაცვა უნდა შეეძლოს", — თქვა ურსულა ფონ დერ ლაიენმა ჟურნალისტებთან.

ევროპული საბჭოს პრეზიდენტმა, ანტონიო კოშტამ ევროპული საბჭოს საგანგებო სამიტის დაწყებამდე კიდევ ერთხელ გამოუცხადა მხარდაჭერა უკრაინას.

"ჩვენ აქ ვართ, რათა უკრაინას ყოვლისმომცველი, სამართლიანი და ხანგრძლივი მშვიდობის მისაღწევად მხარი დავუჭიროთ. ჩვენ თქვენს გვერდით ვართ. ჩვენ გავაგრძელებთ თქვენთან ერთად, ახლაც და მომავალშიც, სამშვიდობო მოლაპარაკებებს, როდესაც გადაწყვეტთ, რომ მოლაპარაკებებისთვის შესაფერისი მომენტია და რაც მთავარია, როგორც ევროკავშირის მომავალ წევრ ქვეყანასთან ერთად", — განაცხადა ანტონიო კოშტამ.

ლიეტუვის პრეზიდენტ გიტანას ნაუსედას თქმით, არ არის საჭირო ახსნა, რამდენად მნიშვნელოვანია ეს შეხვედრა მაშინ, როცა უკრაინა საკუთარი სისხლის საფასურად ყოველდღე ყიდულობს ძვირფას დროს.

მისივე თქმით, საფრანგეთის ბირთვული ქოლგის გაფართოების შესახებ მაკრონის იდეა ნამდვილად, ძალიან სერიოზული შემაკავებელი საშუალება იქნება რუსეთის წინააღმდეგ.

დანიის პრემიერ მეტე ფრედერიქსენის განცხადებით, ახლა ყველაზე მნიშვნელოვანია ევროპის გადაიარაღებაა.

"არ ვფიქრობ, რომ ბევრი დრო გვაქვს. ასე რომ, ჩვენ გვჭირდება ევროპის გადაიარაღება: დახარჯვა, დახარჯვა, დახარჯვა თავდაცვასა და შეკავებაზე, — განუცხადა მეტე ფრედერიქსენმა ბრიუსელში ჟურნალისტებთან საუბრისას.

სტატიაში გამოყენებულია IPN-ის თარგმანი.