დიდთოვლობის გამო გურიაში კრიტიკული მდგომარეობაა შექმნილი — სოფლებში მცხოვრები მოსახლეობა სახლს ვერ ტოვებს, ვერ იღებს გადაუდებელ დახმარებას, ეწურებათ საკვები. სოფელთა უმრავლესობას არ მიეწოდება ელექტროენერგია, რის გამოც დახმარების თხოვნასაც ვერ ახერხებს. მაშინ, როცა სამთავრობო უწყებები ინფორმაციას ავრცელებენ, რომ გზები იწმინდება, მოსახლეობას სამაშველო სამსახურები პასუხობენ, რომ დიდთოვლობის გამო მათთან მისვლას ვერ ახერხებენ.

გურიის მოსახლეობის დასახმარებლად სამოქალაქო საზოგადოებამ მოხალისეთა ჯგუფი, მოხალისეები გურიისთვის შექმნა. თბილისიდან და საქართველოს რამდენიმე ქალაქიდან გურიელების დასახმარებლად უკვე დაიძრა მოხალისეთა კოლონა. პარალელურად, დაზარალებულთა დასახმარებლად ნანუკა ჟორჟოლიანის ფონდში გროვდება თანხა.

დიდთოვლობას მოჰყვა მსხვერპლიც. გურიაში, ოზურგეთის მუნიციპალიტეტის სოფელ კონჭკათში შუახნის მამაკაცი დაიღუპა. მოქალაქეთა ცნობით, ის მეზობელს ეხმარებოდა სახლის დათოვლილი სახურავის გაწმენდაში და ნგრევას ემსხვერპლა. "აჭარა თაიმსის" ცნობით, გაყინული კაცი იპოვეს ქობულეთში. სოფელ ნატანებში გარდაიცვალა ქალი, რომელიც 85 წლის დავრდომილ დედას უვლიდა. ქალის ცხედრის გამოტანა ამ ეტაპამდე ვერ ხერხდება.

აი, რას წერს ხალხი ჯგუფში მოხალისეები გურიისთვის:

"გამარჯობა ,ზემო ნატანებში ორი ჩვილი ბავშვი გვყავს ვერ გავდივართ ვერსად არც შუქი გვაქვს არც გზებია გაწმენდილი ბავშვებისთვის გვჭირდება დახმარება და იქნებ ფოვერბანკიც შეძლოთ სიბნელეში ტირის პატარა" — წერს დავით ჩუმაშვილი.

"ბებოს ვერ ვუკავშირდებით, მარტო ცხოვრობს, ისიც არ ვიცით ცოცხალი არის თუ არა, სამაშველო ვერ ადის, ცენტრალური გზაც კი გასაწმენდია, სახურავი გადმოსათოვლი იყო ბოლოს რომ ვესაუბრეთ, სასწრაფო დახმარებამ ბოდიში მოგვიხადა ვერ ავდივართო, ოზურგეთის რაიონი სოფ. შრომა (ოხოჯური) ელექტროენერგია გამორთულია, მეზობლებსაც ვერ ვუკავშირდები, ყველა გზა და რესურსი ამოვწურეთ, სახურავი ვერ გაუძლებდა და მარტო ვერ შეძლებდა გადმოეთოვლა, შეშაც გამოელეოდა გარეთ გასვლასაც წესით ვერ მოახერხებდა. დამიკავშირდით ძალიან გთხოვთ, 595579449" — წერს თეო სილაგაძე.

"მესამე დღეა ვერ ვუკავშირდებით. 80 წლის ბებიას სამი ობოლი ბავშვი ჰყავს....მესამე დღეა კავშირი აღარ მაქვს.....სახლი უკანა მხარეს ავარიულია....სახლის ფანჯრები ქალს თოკით ჰქონდა საწოლზე გამობმული ისე აკავებდა...ძალიან გთხოვთ იქნებ მოხერხდეს ამ ბებოს და ბავშვების დახმარება. გულიკო დოლიძე, ოზურგეთის რაიონის სოფელი ზედა ბახვი....მშვიდობაური ჰქვია იმ დასახლებას..... " — წერს სიკეთის ქალაქი.

"გთხოვთ დამეხმაროთ სახლის გადათოლვაში სოფ. გომი ვარ მარტო სახლი ჩამოინგრევა სავარაუდოდ მალე" — წერს ნანა ყარეგიშვილი.

"გამარჯობათ. ჩემი სახლი დაინგრა, სახურავი ჩამოიშალა მთლიანად, ჩემი და ჩემი სიძე ორი ბავშვი და ბებო ყველა სახლში იყო, ძლივს გამოასწრეს სახლიდან, მადლობა ღმერთს ცოცხლები არიან. სამაშველომ ტექნიკა გაჭედილია თოვლში ვერ მოვდივართო, ჩემები მეზობელთან არიან ვერც გამოგვყავს იქედან. სახლამდე ვერ მივდივართ თუკი რამე გადარჩა რო გამოვიტანოთ.ისევ ნგრევის საშიშროებაა.. ასე რამდენი ოჯახი იქნება ვინც კონტაქტზეც ვერ გამოდის ღმერთმა იცის" — წერს Mariana MK ჯგუფში.

გარემოს ეროვნული სააგენტოს ცნობით, თოვა საქართველოში კიდევ 3 დღის განმავლობაში გაგრძელდება. გურიის მოსახლეობის დასახმარებლად დღეს მობილიზდა საქართველოს თავდაცვის ძალებიც.