[აეროპორტის] პერიმეტრზე პოლიციელები არ იმყოფებოდნენ, უსაფრთხოება არ იყო უზრუნველყოფილი. ველოდებით ADP-ის რეაგირებას, - ამის შესახებ X-ზე საქართველოს მე-5 პრეზიდენტი, სალომე ზურაბიშვილი წერს.

"თბილისის აეროპორტს მართავს TAV/ADP. ამ ადგილას ზედიზედ ორი თავდასხმა შეძლეს, 17 თებერვალს ყოფილ პრემიერმინისტრზე, 18 თებერვალს კი - პრეზიდენტ ზურაბიშვილზე. პერიმეტრზე პოლიციელები არ იმყოფებოდნენ, უსაფრთხოება არ იყო უზრუნველყოფილი. ველოდებით ADP-ის რეაგირებას",— წერს სალომე ზურაბიშვილი და თბილისის საერთაშორისო აეროპორტის მმართველ კომპანიას მიმართავს.

შეგახსენებთ, რომ 18 თებერვალს, მიუნხენის უსაფრთხოების კონფერენციიდან დაბრუნებულ საქართველოს მე-5 პრეზიდენტს, სალომე ზურაბიშვილს, თბილისის საერთაშორისო აეროპორტში კვერცხები ესროლეს.

მანამდე, 17 თებერვალს თბილისის საერთაშორისო აეროპორტში კვერცხები ესროლეს ყოფილ პრემიერმინისტრს და პარტია გახარია საქართველოსთვის ლიდერს გიორგი გახარიას.

19 თებერვალს სალომე ზურაბიშვილის ადვოკატმა ეკა ბესელიამ ოფიციალურად წარადგინა მოთხოვნა პროკურატურაში, რომ დაიწყოს გამოძიება 18 თებერვალს თბილისის საერთაშორისო აეროპორტში სალომე ზურაბიშვილზე განხორციელებულ თავდასხმასთან დაკავშირებით.

მისი თქმით, ისინი მოითხოვენ, რომ გამოძიება დაიწყოს ორგანიზებული ძალადობრივი ჯგუფების და ასევე მათი დავალების მიმცემთა გამოსავლენად და პასუხისმგებლობისთვის.