აშშ-ის კონგრესი არ დაამტკიცებს უკრაინის ახალ დახმარებას, განაცხადა წარმომადგენელთა პალატის სპიკერმა მაიკ ჯონსონმა ტელეარხ Newsmax-ის ეთერში ხუთშაბათს, 20 თებერვალს. დეტალებზე DW წერს.

მან განმარტა, რომ არ აქვს უკრაინისთვის შემდგომი დახმარების გაწევის ინტერესი და კიევისთვის თანხების გამოყოფა უნდა შეწყდეს, რადგან "ეს ყველაფერი ძალიან დიდი ხანია გრძელდება".

"არავის აქვს ამის "აპეტიტი". შემიძლია გითხრათ, რომ ჩვენი ევროპელი მოკავშირეებიც აღიარებენ ამის საჭიროებას", — თქვა რესპუბლიკელმა ჯონსონმა.

მან ხაზგასმით აღნიშნა, რომ უკრაინაში ომი ჯერ უნდა დასრულდეს.

როგორც Reuters წერს, შეერთებულ შტატებში საბიუჯეტო საკითხებს, ძირითადად, წარმომადგენელთა პალატა წყვეტს, სადაც რესპუბლიკელებს აქვთ უმრავლესობა, რომლებიც პრეზიდენტ დონალდ ტრამპის პოლიტიკას უჭერენ მხარს.

იმავე დღეს აშშ-ს ვიცე-პრეზიდენტმა ჯ.დ ვენსმა განაცხადა, რომ უკრაინა ვერ დაამარცხებს რუსეთს, რადგან მას აქვს რიცხობრივი უპირატესობა და ევროპის იარაღის მარაგი ამოწურულია. ვენსმა ასევე ხაზგასმით აღნიშნა, რომ არც ევროპას, არც აშშ-ის წინა პრეზიდენტის ჯო ბაიდენის ადმინისტრაციას და არც უკრაინელებს "გამარჯვების არანაირი გზა არ ჰქონდათ — ეს ასე იყო სამი წლის წინ, ასე იყო ორი წლის წინ, ასე იყო გასულ წელს და ასეა დღესაც", — ამბობს ვენსი.