ბრიტანული გამოცემა The Telegraph ავრცელებს ინფორმაციას, რომ დიდი ბრიტანეთის პრემიერმინისტრი, კირ სტარმერი, ცეცხლის შეწყვეტის უზრუნველსაყოფად, დონალდ ტრამპს 30 000 ევროპელი ჯარისკაცის უკრაინაში გაგზავნის გეგმას წარუდგენს.

პრემიერმინისტრი და აშშ-ს პრეზიდენტი, მომავალ კვირას ვაშინგტონში შეხვდებიან, სადაც ის ტრამპს ამ გეგმას გააცნობს და მოუწოდებს, რომ აშშ-ს აღმოსავლეთ ევროპაში განლაგებული ჰქონდეს მოიერიშე თვითმფრინავები და რაკეტები, რათა რუსეთის მიერ ზავის პირობის დარღვევის შემთხვევაში, რუსეთის პასუხი შეძლოს.

უცხოური მედიები ამ სტრატეგიას "დამზღვევ ძალას" [Reasurence force] უწოდებენ. სტრატეგია პარიზში გამართულ საგანგებო შეხვედრაზე შემუშავდა, როდესაც ისინი დონალდ ტრამპის და ვლადიმერ პუტინის სამშვიდობო მოლაპარაკებას განიხილავდნენ.

პრემიერმინისტრმა სტარმერმა შეხვედრის შემდეგ განაცხადა, რომ მსგავს შეთანხმებას "ამერიკის ზურგის გამაგრება" სჭირდება იმის გარანტიისთვის, რომ რუსეთმა თავდასხმა არ ცადოს.

"ამერიკის ზურგის გამაგრების" მიზანი იქნება გვქონდეს ნდობა, რომ რა ძალებიც იქნება განლაგებული, რუსეთი მათ არ დაუპირისპირდება," — განაცხადეს დასავლეთის ოფიციალურმა წარმომადგენელმა.

The Telegraph-ის თქმით, სტრატეგიის შედგენის მიზეზი იყო შიში, რომ აშშ-ის პრეზიდენტი უკრაინასთან დაკავშირებული ვალდებულებებისგან "ხელებს დაიბანდა".

ცნობისთვის, აშშ-ის თავდაცვის მდივანმა პიტ ჰეგსეთმა განაცხადა, რომ უკრაინაში სამშვიდობო ოპერაციაზე პასუხისმგებლობა მხოლოდ ევროპელებსა და კანადას ეკისრება.

The Telegraph-ის თანახმად, ზემოხსენებული 30 000-მდე ჯარისკაცი განთავსდება უკრაინის ქალაქებში, პორტებსა და სხვა კრიტიკულ ადგილებში, მათ შორის — ბირთვულ ელექტროსადგურებთან.

"ომით განადგურებულ ქვეყანაში გაცილებით დიდი ძალების განლაგების ნაცვლად, მისია დაეყრდნობა ტექნიკურ მონიტორინგს, მათ შორის სადაზვერვო, სათვალთვალო და სადაზვერვო თვითმფრინავებს, დრონებსა და თანამგზავრებს, რათა "სრული სურათი" უზრუნველყოს იმის შესახებ, თუ რა ხდება," — განაცხადეს დასავლეთის ოფიციალურმა წარმომადგენელმა.

ამასთან საპატრულო ხომალდები გაიგზავნებიან შავ ზღვაში, რათა ამონიტორინგონ რუსული საფრთხე კომერციული საზღვაო გზების მიმართ.

დონალდ ტრამპის ინიციატივით, აშშ-მა რუსეთთან მოლაპარაკებები ცეცხლის შეწყვეტაზე დაიწყო, თუმცა მასში ჯერჯერობით არც უკრაინა და არც ევროკავშირის ქვეყნები ჩართულები არ არიან.