ევროკავშირის ელჩები მოსკოვის წინააღმდეგ სანქციების მომდევნო, უკვე მე-16 პაკეტზე შეთანხმდნენ. ამის შესახებ Financial Times (FT) წერს. გამოცემის წყაროების თანახმად, სანქციები შეეხება კიდევ 13 ბანკს და 73 ტანკერს ეგრეთ წოდებული "ჩრდილოვანი ფლოტის" ტანკერზე, რომელსაც რუსეთი, სავარაუდოდ, ნავთობის ექსპორტისთვის იყენებს. გარდა ამისა, გათვალისწინებულია ევროკავშირის ქვეყნების მიერ გარკვეული სახის რუსული ალუმინის ნაწარმის შესყიდვის ეტაპობრივი აკრძალვა.

სანქციების სიაში ასევე მოხვდება პირები და კომპანიები, რომლებიც, ბრიუსელის თვალსაზრისით, რუსეთს უკრაინაში სამხედრო ოპერაციების განხორციელებაში ეხმარებიან. ევროკავშირის ქვეყნები გეგმავენ, სანქციების ახალი პაკეტი 24 თებერვლამდე, რუსეთის უკრაინის შეჭრის მესამე წლისთავამდე მიიღონ.

Financial Times ადრე იტყობინებოდა, რომ ევროკავშირი ასევე გეგმავს აკრძალოს სათამაშო კონსოლების (Sony-ს PlayStation და Microsoft-ის Xbox) გაყიდვა რუსეთში.

ევროკავშირის საგარეო საქმეთა მინისტრმა კაია კალასმა თქვა, რომ რუსეთის შეიარაღებულმა ძალებმა შესაძლოა ეს მოწყობილობები უკრაინაში უპილოტო საფრენი აპარატების გასაკონტროლებლად გამოიყენონ. როგორც FT-მა განმარტა, ევროკავშირის აკრძალვა მიმართული იქნება გაერთიანების ქვეყნებიდან ცალკეულ გამყიდველებზე, რომლებიც ჯერ კიდევ აგზავნიან სათამაშო კონსოლებს რუსეთში, მათ შორის მეორადებს.