"არაერთი ადგილობრივის ცნობით, ტერიტორია არ ყოფილა შემოსაზღვრული, არც რაიმე გამაფრთხილებელი ნიშანი ყოფილა, რომელიც გასაგებად მიაწოდებდა როგორც სრულწლოვანს, ისე ბავშვს მოსალოდნელი საფრთხის შესახებ ინფორმაციას," — წერს საია-ს იურისტი, თამარ ონიანი სოციალურ ქსელში თებერვალს ბათუმში მომხდარ ტრაგედიაზე.

მისი თქმით, დასახლებულ პუნქტში სახელმწიფო პროექტის მშენებლობა მიმდინარეობდა და სახელმწიფო ვალდებული იყო, უსაფრთხოების ზომები დაეცვა.

იურისტი მომხდარს “სავსებით განჭვრეტად და პროგნოზირებადად” აფასებს. ის წერს, რომ იმ ტერიტორიაზე სადაც ღია წყლით სავსე თხრილებია, ადგილობრივების ცნობით, არანაირი გამაფრთხილებელი ნიშანი არ ყოფილა.

"ღია თხრილებზე (ჭები და სხვა) პასუხისმგებლობა საჯარო სივრცეებში ეკისრება სახელმწიფოს. და მეტიც, ეს პასუხისმგებლობა სიცოცხლის უფლების ჭრილში აქვს ევროსასამართლოს დანახული არაერთ საქმეში.

სახელმწიფოს ვალდებულებაა, შექმნას ისეთი ოპერაციული სისტემა, რომ დაიცვას მის იურისდიქციაში მყოფ პირთა სიცოცხლე, და ეს ღონისძიებები მორგებული უნდა იყოს კონკრეტული საქმიანობის თავისებურებებსა და ადამიანის სიცოცხლისთვის პოტენციურ საფრთხეზე.

სახელმწიფომ უნდა მიიღოს, როგორც პრაქტიკული, ისე პროაქტიული და წინასწარი უსაფრთხოების ზომები მოქალაქეთა სიცოცხლის დასაცავად, მათ შორის, შენობებისა და სამშენებლო სამუშაოების უსაფრთხოებასთან დაკავშირებულ საკითხებთან მიმართებით.

ამ კონკრეტულ შემთხვევაში, მაშინ, როდესაც დასახლებულ პუნქტში თავად სახელმწიფო პროექტის მშენებლობა მიმდებარე ტერიტორიაზე ხდებოდა, სავსებით განჭვრეტადი და პროგნოზირებადი უნდა ყოფილიყო სახელმწიფო სტრუქტურებისთვის ის საფრთხე, რაც ტერიტორიაზე ღია წყლით სავსე თხრილებისგან მოდიოდა მოსახლეობისთვის. შესაბამისად, მას ევალებოდა დაცვითი ღონისძიებების უზრუნველყოფა.

არაერთი ადგილობრივის ცნობით, ტერიტორია არ ყოფილა შემოსაზღვრული, არც რაიმე გამაფრთხილებელი ნიშანი ყოფილა, რომელიც გასაგებად მიაწოდებდა, როგორც სრულწლოვანს, ისე ბავშვს, მოსალოდნელი საფრთხის შესახებ ინფორმაციას, " — განაცხადა იურისტმა.

შეგახსენებთ, 15 თებერვალს ბათუმში, ოცნების ქალაქის ტერიტორიაზე, ორი მცირეწლოვანი ბავშვი თხრილში ჩავარდა და დაიღუპა. პირველადი ცნობებით, ბავშვები იმ ტერიტორიაზე ჩავარდნენ ორმოში, სადაც სამშენებლო სამუშაოები მიმდინარეობს და მათ რამდენიმე საათის განმავლობაში ეძებდნენ. ქართული ოცნების წარმომადგენლები და სამშენებლო კომპანია ანაგი უარყოფენ იმ ფაქტს, რომ ტრაგედია სამშენებლო სამუშაოების ტერიტორიაზე მოხდა.