"კატასტროფაა და წარმოუდგენელია, რომ საქართველოდან დღეს ოფიციალური ხელისუფლების წარმომადგენლები მიუნხენის უსაფრთხოების კონფერენციაზე არ არიან", — ამის შესახებ მიუნხენში მყოფმა პარტია გახარია საქართველოს ლიდერმა და საქართველოს ყოფილმა პრემიერმინისტრმა, გიორგი გახარიამ ტვ პირველის ეთერში განაცხადა.

მისი თქმით, ოცნების ხელისუფლების წარმომადგენლებს კონფერენციაზე მიუნხენში ჩამოსვლა შეეძლოთ, მაგრამ არ ჩამოვიდნენ იმიტომ, რომ მათთან შეხვედრას არავინ მოისურვებდა.

"პირველ რიგში მიხარია, რომ აქ იქნება სალომე ზურაბიშვილი და, მე დარწმუნებული ვარ, რომ ჩვენ ერთად შევძლებთ დღეს გლობალურ ლიდერებს, რომლებიც მონაწილეობენ გლობალური ცვლილების წესრიგში, ავუხსნათ, რომ საქართველო არის ის ქვეყანა, რომელიც ყოველთვის იმსახურებდა და დღეს განსაკუთრებით იმსახურებს მხარდაჭერას იყოს დემოკრატიული, ცივილიზებული სამყაროს ნაწილი.

დღეს მიუნხენში ახალი გლობალური წესრიგის კონტურები იხატება, კატასტროფაა და წარმოუდგენელია, რომ საქართველოდან დღეს ოფიციალური ხელისუფლების წარმომადგენლები მიუნხენის უსაფრთხოების კონფერენციაზე არ არიან. თქვენ გგონიათ მათ არ შეეძლოთ აქ ჩამოსვლა? შეეძლოთ, მაგრამ კიდევ უფრო დიდ სირცხვილს დაეჯახებოდნენ, იმიტომ, რომ მათთან არავინ შეხვედრას არ მოისურვებდა და ვერავის დაელაპარაკებოდნენ. ამიტომ არ არიან დღეს აქ წარმოდგენილები. მათ საკუთარი ეგო დააყენეს ყველაზე მაღლა იმის მაგივრად, რომ საქართველო დღეს აქ იყოს წარმოდგენილი, როგორც იმ გლობალური წესრიგის კრიტიკულად მნიშვნელოვანი ნაწილი, რომელზეც ხვალ და ზეგ იქნება აქ საუბარი", — თქვა გახარიამ.

მიუნხენის უსაფრთხოების კონფერენცია დღეს იხსნება და 16 თებერვალს დაიხურება. მას საქართველოდან საქართველოს მე-5 რეზიდენტი და ყოფილი პრემიერმინისტრი გიორგი გახარია დაესწრებიან.