"ვისაც გსურთ ამ რეალობასთან შეგუება, კი ბატონო, მაგრამ ჩვენ არ ვეგუებით. რამდენი ხანიც არ უნდა მომიწიოს აქ ყოფნა, ვიცი რომ თავისუფალ საქართველოში შევხვდებით. [...] ჰო და, კიდევ, ყველაზე მთავარია მზია ამაღლობელი," – წერს ჯგუფურ ძალადობაში ბრალდებული, იუმორისტი ონისე ცხადაძე ციხიდან კიდევ ერთ წერილში.

"როცა საკუთარი თავი ვიპოვე და ყოველდღიურად ჩემი შესაძლებლობების მაქსიმუმისკენ მივიწევდი, ზუსტად მაშინ აღმოვჩნდი აქ. მაგრამ არ ვდარდობ.

სიცოცხლის ფასადაც კი მიღირს იმ რეალობასთან ბრძოლა, სადაც გოგა ხაინდრავა მოღალატეებს გვეძახის იმედის ეთერში და, მომდევნო დღეს, იგივე ეთერში, იმავეს იმეორებს ზვიად გამსახურდიას შვილი. (ზვიადი, ალბათ, ამ დროში, საკუთარ შვილს დაუძახებდა KGB-ს აგენტს, ცოცხალი რომ იყოს).

საკანში ყოფნა მირჩევნია იმ რეალობასთან შეგუებას, სადაც შალვა რამიშვილი უზნეოებს გვეძახის, ამ დროს კი საკუთარ შვილსაც არ უყვარს.

ამ დროს კი, შალვასთან ერთად განათლებას გვიწუნებს სოკრატე სულთანიშვილი და არისტოტელე ოდიშარია.

ვისაც გსურთ ამ რეალობასთან შეგუება, კი ბატონო, მაგრამ ჩვენ არ ვეგუებით. რამდენი ხანიც არ უნდა მომიწიოს აქ ყოფნა, ვიცი რომ თავისუფალ საქართველოში შევხვდებით.
ავისრულებ ჩემს ოცნებას და მსოფლიო გამიცნობს.

ჰო და, კიდევ, ყველაზე მთავარია მზია ამაღლობელი" — წერს ონისე ცხადაძე წერილში (სტილი დაცულია).

შეგახსენებთ, გასული წლის 6 დეკემბერს, შსს-მ ჯგუფური ძალადობის ორგანიზების, ხელმძღვანელობის, მასში მონაწილეობისა და ძალადობრივი ქმედებისკენ საჯაროდ მოწოდების ბრალდებით ონისე ცხადაძე, ანდრო ჭიჭინაძესთან და 3 სხვა პირი დააკავეს. მათ 9 წლამდე თავისუფლების აღკვეთა ემუქრებათ.