"მანდატების საკითხს ივანიშვილის შანტაჟის იარაღად რომ არ ვაქცევდით და მის გადასაწყვეტად რომ არ გავიხდიდით საქმეს, ესეც წინასწარ დამარცვლით ავხსენით", — ამის შესახებ სოციალურ ქსელში პარტია გახარია საქართველოსთვის ერთ-ერთი ლიდერი, ბერდია სიჭინავა წერს და პარლამენტის მიერ იმ 49 დეპუტატის მანდატების გაუქმებას ეხმაურება, რომლებმაც პარლამენტის შესაბამისი მოთხოვნით მიმართეს.

სიჭინავას თქმით, მათ პარტიას არავის ემოციური ყიჟინა არ აღელვებს, "ანგარიშვალდებულება აქვთ მათი მხარდამჭერებისა და ამ ქვეყნის მოქალაქეების წინაშე".

"მგონი აქამდე უნდა გაეგო ყველას, თუმცა დღევანდელი დღეც კარგ მაგალითად გამოდგება, რომ არცერთი სხვა პარტიის და პოლიტიკოსის ემოციური დღის წესრიგით არ მოქმედებს ჩვენი გუნდი და ეს არ შეიცვლება არასდროს!

არავის ემოციური ყიჟინა არ გვაღელვებს, პოლიტიკას “ვაკეთებთ” ცივი გონებით, სადაც ემოციებს, განსაკუთრებით გადაწყვეტილებების მიღებისას, არასდროს უჭირავს ადგილი და ანგარიშვალდებულება გვაქვს, პირველ რიგში, ჩვენი მხარდამჭერების და ამ ქვეყნის მოქალაქეების წინაშე.

როცა ვთქვით, რომ ამ პარლამენტს ლეგიტიმაცია არ ექნება ჩვენგან, ესე იგი არ ექნება და აქ დავსვათ წერტილი…

მანდატების საკითხს ივანიშვილის შანტაჟის იარაღად რომ არ ვაქცევდით და მის გადასაწყვეტად რომ არ გავიხდიდით საქმეს, ესეც წინასწარ დამარცვლით ავხსენით.

ყველა პოლიტიკური აქტორის გადაწყვეტილებას ვცემთ პატივს…

იგივეს მოვითხოვთ მათგან ჩვენ მიმართ.

პარლამენტის ლეგიტიმაცია/არალეგიტიმაციის საკითხს ვიღაცების მანდატების შეწყვეტამდე ნუ დავიყვანთ….

შეგახსენებთ, 5 თებერვლამდეც არალეგიტიმური იყო ეს პარლამენტი.

საერთო ბრძოლა გვაქვს და ჯობს, მიზანზე ვკონცენტრირდეთ:

სინდისის პატიმრები უნდა გავათავისუფლოთ!

ახალი არჩევნები უნდა მოვიპოვოთ!", — წერს ბერდია სიჭინავა.

შეგახსენებთ, რომ გუშინ ოცნების პარლამენტმა სამი პოლიტიკური გაერთიანების 49 ოპოზიციონერ დეპუტატს უფლებამოსილების ვადა შეუწყვიტა. რის შემდეგაც — 150-წევრიანი პარლამენტი 101-წევრიანი გახდა. ეს ის პოლიტიკური გაერთიანებებია, რომელთაც 26 ოქტომბრის საპარლამენტო არჩევნებში ბარიერი გადალახეს, მაგრამ არჩევნების შედეგები არ აღიარეს და სადეპუტატო მანდატების შეწყვეტა მოითხოვეს. ოცნების პარლამენტისთვის მანდატების გაუქმების მოთხოვნით არ მიუმართავს მხოლოდ გიორგი გახარიას პარტია გახარიას საქართველოსთვის.