სურსათის სააგენტოს განცხადებით, 27 იანვარს დაავადებათა კონტროლის ცენტრისგან ინფორმაცია მიიღეს ტრიქინელოზის დადასტურებული შემთხვევების შესახებ. ამასთან, გავრცელებულ ინფორმაციაში წერია, რომ ტრიქინელოზით დაავადების ფაქტზე მოკვლევა დაიწყეს.

"შეტყობინების თანახმად, 63 წლის პაციენტს დაავადების კლინიკური ნიშნების გამოვლენამდე რამდენიმე დღით ადრე საკვებად მიღებული აქვს სოფელ ოზურგეთში ნაყიდი ღორის ხორცი და კუპატი (ხორცი მიიღო ოჯახის სხვა წევრმაც, თუმცა, ამ დროისთვის მას დაავადების ნიშნები არ აღენიშნება). დაავადებული პირი ხორცის და სურსათის გამყიდველის ვინაობას ვერ ასახელებს.

შეტყობინების მიღებისთანავე, რეაგირებისთვის ინფორმაცია მყისიერად გაეგზავნა გურიის რეგიონულ სამმართველოს და ვეტერინარიის დეპარტამენტს. სურსათის ეროვნული სააგენტოს სპეციალისტებმა მოკვლევა უკვე დაიწყეს", — ნათქვამია განცხადებაში.

დაავადება სახელად სტრიქინელოზი ადამიანს შეიძლება დაემართოს მიკროსკოპული პარაზიტი — ტრიქინელათი, ინფიცირებული ცხოველების უმი ან თერმულად, არასაკმარისად დამუშავებული ხორცის საკვებად მიღებისას. პარაზიტი შესაძლოა იყოს ღორის ხორცში, თუმცა რეზერვუარი შესაძლოა, იყოს სხვა გარეული ცხოველი და ცხენიც.

ტრიქინელოზის კლინიკური ნიშნებია: თავის ტკივილი, ცხელება, შემცივნება, ხველა, სახის და თვალების შეშუპება, სახსრებისა და კუნთების ტკივილი, კანის ქავილი. პირველ სიმპტომებს შეიძლება ახლდეს დიარეა ან ყაბზობა. დაავადების მძიმედ მიმდინარეობას ახასიათებს კოორდინაციის დარღვევა, გულის და სუნთქვის პრობლემები.

სურსათს ეროვნული სააგენტო გავრცელებულ განცხადებაში მოქალაქეებს მოუწოდებს, რომ თავი შეიკავონ არაორგანიზებული ვაჭრობის ადგილებში ხორცის შეძენისგან, იქ სადაც გაურკვეველია ხორცის წარმომავლობა, ღორი არ არის დაკლული სასაკლაოზე და, შესაბამისად, უცნობია, არის თუ არა შემოწმებული ტრიქინელოზზე.