რუსეთის ხელისუფლებამ ოკუპირებულ ყირიმში მდებარე ქერჩის ხიდზე უწყვეტი საპასპორტო კონტროლი შემოიღო, — ინფორმაციას ადგილობრივ მედიაზე დაყრდნობით "ეხო კავკაზა" ავრცელებს.

კრასნოდარის მხარისა და ოკუპირებული ყირიმის დამაკავშირებელ ხიდზე მძღოლებსა და მგზავრებს დოკუმენტებს უმოწმებენ.

ოკუპირებული ყირიმის ე.წ. ტრანსპორტის მინისტრი, ალექსანდრ ოვდიენკოს თქმით, გადაწყვეტილება რუსული სპეცსამსახურების მუშაობას უკავშირდება. ოვდიენკოს მტკიცებით, ისინი კონტრტერორისტულ ღონისძიებებს ატარებენ.

არ არის ცნობილი, რამდენ ხანს გაგრძელდება დოკუმენტების გადამოწმების რეჟიმი. ოკუპირებული ყირიმის რეგიონში უკრაინის სარაკეტო და საზღვაო თავდასხმების დროს რუსეთის ხელისუფლება რეგულარულად ბლოკავს ხიდზე მოძრაობას.

2022 წლის 8 ოქტომბრის დილით ქერჩის ხიდზე აფეთქება მოხდა. რუსული სამთავრობო მედიის ინფორმაციით, აფეთქდა სატვირთო, ცეცხლი კი შემდეგ მატარებელს გაუჩნდა, რომელსაც საწვავის ავზი გადაჰქონდა.

აფეთქებას ხუთი ადამიანი ემსხვერპლა.რუსეთში მას ტერაქტს უწოდებდნენ, პუტინმა მომხდარზე სამთავრობო კომისიის შექმნის ბრძანება გასცა. უკრაინა აცხადებს, რომ ხიდს ლეგიტიმურ სამხედრო სამიზნედ მიიჩნევს.