სოლიდარობა მზია ამაღლობელს! დღეს ეს არის ჩემი უპირველესი სათქმელი, ამის შესახებ საზოგადოებრივი მაუწყებლის აჭარის ტელევიზიის ჟურნალისტმა და გადაცემა "სათქმელის" წამყვანმა, ირინა ყურუამ პირდაპირ ეთერში განაცხადა.

მისი თქმით, პრესის თავისუფლების, ჟურნალისტებისა და ადამიანის უფლებათა დამცველი საერთაშორისო ორგანიზაციები საქართველოს ხელისუფლებას მოუწოდებენ, დაუყოვნებლივ გაათავისუფლონ ონლაინ გამოცემების ბათუმელების და ნეტგაზეთის დამფუძნებელი და დირექტორი მზია ამაღლობელი და მისი სათქმელიც სწორედ ესაა.

"სოლიდარობა მზია ამაღლობელს, დღეს ეს არის ჩემი უპირველესი სათქმელი. პრესის თავისუფლების, ჟურნალისტებისა და ადამიანის უფლებათა დამცველი საერთაშორისო ორგანიზაციები საქართველოს ხელისუფლებას მოუწოდებენ, დაუყოვნებლივ გაათავისუფლონ ონლაინ გამოცემების ბათუმელების და ნეტგაზეთის დამფუძნებელი და დირექტორი მზია ამაღლობელი. ჩემი სათქმელიც სწორედ ეს არის, დაუყოვნებლივ და უპირობოთ გათავისუფლდეს მზია ამაღლობელი", – განაცხადა ირინა ყურუამ პირდაპირ ეთერში.

შეგახსენებთ, რომ ბათუმელების და ნეტგაზეთის დამფუძნებელი და დირექტორი მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". გათავისუფლებიდან მალევე, მზია ამაღლობელი მეორედაც დააკავეს. პროკურატურამ მას ბრალი სისხლის სამართლის კოდექსის 353-ე პრიმა მუხლის პირველი ნაწილით წაუყენა, რაც პოლიციელზე თავდასხმას გულისხმობს და 4-7 წლით პატიმრობით ისჯება.