თელავის მუნიციპალიტეტში, სოფელ ართანის მახლობლად კოხტას მთის ფერდობზე ხანძარია. ამის შესახებ ინფორმაციას საზოგადოებრივი მაუწყებლი ავრცელებს. მათივე ინფორმაციით, ვინაიდან შემთხვევის ადგილი მიუვალია და ფერდობზე ხშირი ტყეა, მეხანძრეები ცეცხლის კერამდე ფეხით უნდა ავიდნენ. აქედან გამომდინარე, ხანძრის მასშტაბის შესახებ დეტალური ინფორმაცია მოგვიანებით გახდება ცნობილი.

თელავის გამგებლის წარმომადგენელი სოფელ ართანის ადმინისტრაციული ერთეულში, ბესიკ გაიპარაშვილი On.ge-სთან საუბარში ჰყვება, რომ ხანძრის ორი კერაა და დაახლოებით ერთ ჰექტრამდე ტერიტორიას უკიდია ცეცხლი. მისი ვარაუდით, ხანძარი ჭექა ქუხილის შედეგად გაჩნდა და ახლა 70-მდე მეხანძრე მიდის ადგილზე:

"ფეხით ადიან და ოთხი საათი მაინც დასჭირდებათ რომ მივიდნენ. კვამლი ახლოსაც ვერ მიუშვებს მათ, რომ რაიმე გააკეთონ. ვერტმფრენია საჭირო და ძალიან ადვილად მოხდებოდა ლოკალიზაცია. თუ დღეს არ იქნება, მერე შეიძლება ერთი კვირა დასჭირდეს".

საგანგებო სიტუაციების სამსახურის პრესსამსახურმა On.ge-სთან საუბარში განაცხადა, რომ დღეს დილით შევიდა მათთან შეტყობინება, რომ კოხტას მთის ფერდობიდან კვამლი ამოდის. ადგილზე სახანძრო-სამაშველო სამსახურის რამდენიმე ჯგუფია გასული.