პროსამთავრობო პარტია, ხალხის ძალის ერთ-ერთი ლიდერი, გურამ მაჭარაშვილი აცხადებს, რომ აშშ-ს მიერ ბიძინა ივანიშვილის დასანქცირებით გამოჩნდა, რომ აშშ "უცხოური ძალაა".

მისი თქმით, ის უცხოური ძალები, რომლებიც ემსახურებიან არა მშვიდობის შენარჩუნებას საქართველოში, არამედ არეულობასა და ხელისუფლების უკანონო გზებით შეცვლას, ბოლო დღეებს ითვლიან და ბოლო კუდებს იქნევენ.

"ბიძინა ივანიშვილმა არაერთხელ აღნიშნა, რომ ის ფაქტობრივად დასანქცირებული იყო. აშშ სამი წლის განმავლობაში ამბობდა, რომ კრედიტ სუისის დავასთან კავშირში არ იყო და საკითხი სასამართლოს უნდა გადაეწყვიტა. ახლა გამოაცხადეს, რომ ივანიშვილი სინგაპურის საერთაშორისო სასამართლოში მიგებულ ფულს აშშ-ს გარეშე ვერ წაიღებს. აღმოჩნდა, რომ ბიძინა ივანიშვილის ადვოკატი მართალი იყო, როცა ამბობდა, რომ ამ საქმეში ამერიკული ძალები იყო ჩარეული და ივანიშვილი ფაქტობრივად დასანქცირებული იყო.

ხალხის ძალა ყოველთვის ამბობდა, რომ აშშ-ში სხვადასხვა თანამდებობაზე მოკალათებული უცხოური ძალა ებრძოდა საქართველოს ხელისუფლებას და ბიძინა ივანიშვილს. ახლა თავად აშშ-მ დაადასტურა ის, რომ ბიძინა ივანიშვილი "კრედიტ სუის"-თან დაკავშირებულ თანხებს ვერ მიიღებს — როცა გვეკითხებოდნენ თუ სად არის უცხოური ძალა, ა ბატონო, გამოჩნდა, თუ სად არის უცხოური ძალა!

ივანიშვილი დაასანქცირეს იმიტომ, რომ არ დასთანხმდა საქართველოში ომის დაწყებას, მეორე ფრონტის გახსნას და არეულობას. ივანიშვილის დასანქცირების გადაწყვეტილებით აშშ-ს იმ ძალებმა, რომლებიც იმედი მაქვს, რომ მალე სათავეში აღარ იქნებიან, აღიარებითი ჩვენება გააკეთეს", — განაცხადა გურამ მაჭარაშვილმა.

შეგახსენებთ, რომ აშშ-ის სახაზინო დეპარტამენტმა ბიძინა ივანიშვილს ფინანსური სანქციები 27 დეკემბერს დაუწესა. ფინანსური სანქციები გულისხმობს, რომ ივანიშვილის ყველა აქტივი რომელიც აშშ-ის იურისდიქციაშია ან კონტროლდება აშშ-ის მოქალაქის მიერ, დაიბლოკება. სახაზინო დეპარტამენტმა ივანიშვილს სანქციები 14024-ე აღმასრულებელი განკარგულებით დაუწესა, რომელიც სამართლებრივ საფუძველს უქმნის სანქციების დაწესებას იმ პირებისა და ორგანიზაციების მიმართ, რომლებიც მონაწილეობენ რუსეთის ფედერაციის საზიანო საგარეო საქმიანობაში. ეს საქმიანობები მოიცავს დემოკრატიული პროცესებისთვის ძირის გამოთხრას, კიბერთავდასხმებს, არჩევნებში ჩარევას და სხვა დესტაბილიზაციურ მოქმედებებს უცხო ქვეყნებში.