თბილისელებსა და დედაქალაქის სტუმრებს დღეიდან შესაძლებლობა აქვთ, ესტუმრონ
"საახალწლო სოფელს", სადაც მრავალფეროვანი გასართობი ღონისძიებები დახვდებათ, — ამის შესახებ ინფორმაციას ქალაქის მერია ავრცელებს.

"დედაენის ბაღში და იუსტიციის სახლის ავტოსადგომის მიმდებარედ არსებულ "საახალწლო სოფელში" მოწყობილია: ⁠სამეწარმეო და ⁠გასტრონომიული მარკეტები, გამოფენა-გაყიდვა "თბილისის საშობაო ბაზარი", საბავშვო თემატური სივრცეები, ⁠⁠სანტას სახლი და სახელოსნო, ატრაქციონების პარკი, საციგურაო ყინულის მოედანი, თემატური დეკორაციები და ინსტალაციები.

რაც შეეხება ორბელიანის მოედანს, აღნიშნულ ტერიტორიაზე მდებარე "საახალწლო სოფელში" მისულ სტუმრებს დახვდებათ: ⁠გასტრონომიული მარკეტი, "თბილისის საშობაო ბაზარი", საახალწლო მატარებელი, თემატური დეკორაციები და ინსტალაციები, ⁠⁠ტკბილეულის ფესტივალი.

"საახალწლო სოფელში" ყოველდღიურად გაიმართება: ⁠ზღაპრის გმირების მსვლელობა, საბავშვო კონცერტები, საღამოს კონცერტები, ⁠⁠ღია კინოთეატრი, ⁠⁠თეატრალიზებული არმოდგენა/პერფორმანსები და ⁠⁠საბავშვო-გასართობი აქტივობები.

"საახალწლო სოფელში" ღონისძიებები 7 იანვრის ჩათვლით გაგრძელდება", — წერს მერია.

შეგახსენებთ, რომ მეწარმეებისთვის, რომლებმაც მერიის მიერ ორგანიზებულ საშობაო ბაზარში მონაწილეობაზე უარი თქვეს სპეციალური პლატფორმა happyeuyear.ge შეიქმნა. როგორც NEWS.On.ge-სტან პლატფორმის შემქმნელი ნათია ზავრაშვილი ამბობს, პლატფორმის დახმარებით შეგიძლიათ კატეგორიების მიხედვით მარტივად შეარჩიოთ საახალწლო საჩუქრები საყვარელი ადამიანებისთვის და სოლიდარობა გამოუცხადოთ მეწარმეების პროტესტს.

"ასეულობით მეწარმემ ქვეყანაში მიმდინარე უწყვეტი პროტესტის მხარდასაჭერად უარი თქვა მერიის მიერ ორგანიზებულ საშობაო ბაზარში მონაწილეობასა და წლის ყველაზე მნიშვნელოვან სავაჭრო პერიოდში შემოსავლის მიღებაზე, მათ კი ისინი ონლაინ პლატფორმა Happy EU Year-ზე გააერთიანეს.

მიგვაჩნია, რომ წელს დედაქალაქის ქუჩებში პროტესტის ხმა ყველგან უნდა ისმოდეს. პლატფორმის დახმარებით შეგიძლიათ კატეგორიების მიხედვით მარტივად შეარჩიოთ საახალწლო საჩუქრები თქვენი საყვარელი ადამიანებისთვის და სოლიდარობა გამოუცხადოთ ამ მეწარმეების პროტესტს.

მხოლოდ ერთად დგომით შევძლებთ დავიბრუნოთ თავისუფალი, დემოკრატიული და სამართლიანი ახალი წელი!", — აცხადებს ნათია ზავრაშვილი.