"უჩვეულო რუსული ზამთარი გვაქვს საქართველოში, მაგრამ გვექნება ქართული გაზაფხული", – საქართველოს პრეზიდენტი, სალომე ზურაბიშვილი სოციალურ ქსელ X-ში მიმდინარე საპროტესტო აქციებს ეხმაურება.

პრეზიდენტმა 16 დეკემბრის ღამეს კიდევ რამდენიმე პოსტი დაწერა.

სალომე ზურაბიშვილმა რუსთაველს გამზირზე აქციის მონაწილეების სიმღერის ვიდეოც გააზიარა. მისი თქმით, "სიმღერა იყო გზა, რამაც საუკუნეების განმავლობაში დაიცვა და გადაარჩინა საქართველო".

"მშვიდობიანად, მაგრამ მტკიცედ. "მიმღერია, კიდეც ვიმღერებ წლების დასაბრუნებლად". სიმღერა იყო გზა, რამაც საუკუნეების განმავლობაში დაიცვა და გადაარჩინა საქართველო!", — დაწერა პრეზიდენტმა.

სალომე ზურაბიშვილი პარლამენტის მიერ ადმინისტრაციულ სამართალდარღვევათა კოდექსში შეტანილ ცვლილებებს ეხმაურება და აკრიტიკებს.

"პრევენციული დაკავება: ახლა პოლიციას შეუძლია პრევენციულად დააკავოს პირები, იმის ვარაუდით, რომ მათ შეიძლება ჩაიდინონ დანაშაული წინასწარი დარღვევების საფუძველზე. დაკავება სასამართლოში წარდგენისთვის: პოლიციას შეუძლია დააკავოს პირები მხოლოდ სასამართლოში მათი წარდგენის უზრუნველსაყოფად", — წერს პრეზიდენტი.