პარლამენტის შენობასთან თბილისის მერიის თანამშრომლებმა 8 დეკემბრის 04:40 საათზე საახალწლო ნაძვის ხის აწყობა დაიწყეს.

კონტექსტისთვის, მე-10 დღეა, რაც რუსთაველზე ფართომასშტაბიანი პროევროპული აქცია მიმდინარეობს. აქციის მონაწილეები ირაკლი კობახიძის განცხადებას აპროტესტებენ, 2028 წლამდე ევროკავშირთან მოლაპარაკებების შეჩერების თაობაზე.

10 დღის მანძილზე ნაცემი და დაპატიმრებულია ასობით მომიტინგე. განსაკუთრებული სისასტიკით უსწორდებიან ჟურნალისტებსა და ოპერატორებს.

7 დეკემბერს რუსთაველის გამზირზე არაფორმალური, ნიღბიანი ჯგუფები გამოჩნდნენ, რომლებიც აქციაზე მიმავალ მოქალაქეებს ფიზიკურად უსწორდებიან.

მსგავს ფაქტს შეესწრო ტვ პირველის გადამღები ჯგუფი, რა დროსაც უცნობმა ნიღბიანებმა ჟურნალისტსა და ოპერატორზე გამორჩეული სისასტიკით იძალადეს.

ძალადობის მომენტში ადგილზე მობილიზებული იყო საპატრულო პოლიციის ეკიპაჟები, თუმცა მათ შესაბამისი რეაგირება არ მოუხდენიათ.