საქართველოს პრეზიდენტ სალომე ზურაბიშვილისა და პოლიტიკური პარტიების სარჩელი 26 ოქტომბრის არჩევნების არაკონსტიტუციურად ცნობაზე, საკონსტიტუციო სასამართლომ წარმოებაში არ მიიღო. გადაწყვეტილებას სასამართლო ვებგვერდზე აქვეყნებს.

"1. არ იქნეს მიღებული არსებითად განსახილველად №1848 და №1849 კონსტიტუციური სარჩელები ("საქართველოს პრეზიდენტის კონსტიტუციური სარჩელი საქართველოს პარლამენტისა და აჭარის ავტონომიური რესპუბლიკის უმაღლესი საბჭოს არჩევნების მომწესრიგებელი ნორმებისა და ამ ნორმების საფუძველზე ჩატარებული 2024 წლის 26 ოქტომბრის არჩევნების კონსტიტუციურობის შესახებ და საქართველოს პარლამენტის წევრების (თამარ კორძაია, ლევან ბეჟაშვილი, გიორგი ბოტკოველი და სხვები (სულ 30 წევრი)) კონსტიტუციური სარჩელი საქართველოს პარლამენტის არჩევნების მომწესრიგებელი ნორმებისა და ამ ნორმების საფუძველზე ჩატარებული 2024 წლის 26 ოქტომბრის არჩევნების კონსტიტუციურობის შესახებ").

2. განჩინება საბოლოოა და გასაჩივრებას ან გადასინჯვას არ ექვემდებარება.

3. განჩინებას დაერთოს მოსამართლე გიორგი კვერენჩხილაძის განსხვავებული აზრი №1848 და №1849 კონსტიტუციური სარჩელების არსებითად განსახილველად მიღებაზე უარის თქმასთან დაკავშირებით, სასარჩელო მოთხოვნის იმ ნაწილში, რომელიც შეეხება საზღვარგარეთ მყოფი ამომრჩევლების არჩევნებში მონაწილეობის ხელმისაწვდომობას.

4. განჩინებას დაერთოს მოსამართლე თეიმურაზ ტუღუშის განსხვავებული აზრი №1848 და №1849 კონსტიტუციური სარჩელების არსებითად განსახილველად მიღებაზე უარის თქმასთან დაკავშირებით, სასარჩელო მოთხოვნის იმ ნაწილში, რომელიც შეეხება კენჭისყრის ფარულობასა და საზღვარგარეთ მყოფი ამომრჩევლების არჩევნებში მონაწილეობის ხელმისაწვდომობას.

5. განჩინება გამოქვეყნდეს საქართველოს საკონსტიტუციო სასამართლოს ვებგვერდზე 15 დღის ვადაში, გაეგზავნოს მხარეებს და "საქართველოს საკანონმდებლო მაცნეს" — ვკითხულობთ

გადაწყვეტილებაში, რომელიც პლენუმმა შემდეგი შემადგენლობით მიიღო:

  1. მერაბ ტურავა

  2. ევა გოცირიძე

  3. გიორგი თევდორაშვილი

  4. ირინე იმერლიშვილი

  5. გიორგი კვერენჩხილაძე

  6. ხვიჩა კიკილაშვილი

  7. მანანა კობახიძე

  8. ვასილ როინიშვილი

  9. თეიმურაზ ტუღუში

ამასთან, განსხვავებული მოსაზრება გიორგი კვერენჩხილაძემ დააფიქსირა სასამართლო მოთხოვნის იმ ნაწილში, რომელიც ეხებოდა საზღვარგარეთ მყოფი ამომრჩევლების არჩევნებში მონაწილეობის ხელმისაწვდომობას.

შეგახსენებთ, რომ საკონსტიტუციო სასამართლოში პრეზიდენტის სახელით სარჩელი შევიდა 19 ნოემბერს, არჩევნების საყოველთაობისა და ფარულობის პრინციპების დარღვევის ფაქტებზე. აქედან გამომდინარე, ზურაბიშვილი მოითხოვდა არჩევნების მომწესრიგებელი სადავო ნორმებისა და მათ საფუძველზე ჩატარებული არჩევნების საბოლოო შედეგების არაკონსტიტუციურად ცნობას.