ფორმულის წამყვანმა სოფო ხუნწარიამ სამეურვეო საბჭოს უფროსს ვასილ მაღლაფერიძეს მიმართა და მისი და არხის გენერალური დირექტორის თინათინ ბერძენიშვილის გადადგომა მოითხოვა.

"თქვენ რას ემსახურებით, ვასიკო მასწ... სად წახვედით, ვასიკო, მასწ... პირდაპირ შემიძლია ვთქვა, თინა, მაპატიე, შენი ბრალია, ეკა შონიას ბრალია, რომელსაც აბარია საინფორმაციო პოლიტიკა, რომელიც არის ჩემი ჯგუფელი, მისი ბრალია. სად არის გიორგი გვიმრაძე? ქართული ოცნების შეხვედრებზე და ზეიმებზე რომ დადიხართ, ვასიკო, მასწ, მაგის ბრალია. მოვითხოვთ თქვენს გადადგომას, ორივესი, საზოგადოებრივი არხი უნდა დაუბრუნდეს ხალხს, ეს არის ჩვენი ფულით, გადასახადებით შექმნილი არხი.
სად არის დათო ევგენიძე? რომელიც გვეგონა, რომ ყოველთვის იყო სიმართლის მხარეს, რომელიც დღეს დადის ქართული ოცნების შეკრებებზე და ულოცავს მათ გამარჯვებას. ეკა შონიას მინდა ვუთხრა, მთელი შენი ჯგუფი აქციაზე დგას და შენ რას ემსახურები დღეს? ეს მინდოდა თქვენთვის მეთქვა, რომ გადადექით დღესვე“. — ამბობს სოფო ხუნწარია.

გენერალური დირექტორისა და სამეურვეო საბჭოს თავმჯდომარის გადადგომის პარალელურად, აქციის მონაწილეები ითხოვენ საზოგადოებრივი მაუწყებლის პირდაპირი ეთერის დათმობას.