ვითხოვთ ყველა პასუხისმგებლიანი პოლიტიკური სუბიექტის კონსოლიდაციას ერთადერთი ლეგიტიმური კონსტიტუციური ინსტიტუტის პრეზიდენტის ქვეშ და ვიწყებთ ბრძოლას საქართველოს გადასარჩენად, — ამ სიტყვებით მიმართა პარლამენტთან შეკრებილ საპროტესტო აქციის მონაწილეებს რეჟისორმა პაატა ციკოლიამ. მისი თქმით, დაუმორჩილებლობით, ყოველ ნაბიჯზე ბრძოლით მივიღებთ იმას, რაც გვეკუთვნის, მივიღებთ ევროპულ სახელმწიფოს.

"ერთადერთი, რაც ჩვენ გვაკლია, არის ერთიანობა, ერთობა. ხვალ გავიღვიძებთ ისეთ საქართველოში, რომელსაც ეყოლება პოლიტიკური ცენტრი და რომელთან ერთადაც მთელი საზოგადოება გავუმკლავდებით ამ გამოწვევას. და დაუმორჩილებლობით, ყოველ ნაბიჯზე ბრძოლით მივიღებთ იმას, რაც გვეკუთვნის, მივიღებთ ევროპულ სახელმწიფოს. ახალი არჩევნებით გვეყოლება ლეგიტიმური წარმომადგენლობითი ორგანო, ლეგიტიმური პარლამენტი, რომელიც თითოეული ჩვენთაგანის ინტერესს და ხმას დაიცვას ამ შენობაში. თუკი რამე შეგვიძლია ვიზეიმოთ, უნდა ვიზეიმოთ ოპოზიციური სპექტრის ხილული ერთობა და მათ მიერ დეკლარირებული ბრძოლის წამოწყება.

ვითხოვთ ყველა პასუხისმგებლიანი პოლიტიკური სუბიექტის კონსოლიდაციას ერთადერთი ლეგიტიმური კონსტიტუციური ინსტიტუტის პრეზიდენტის ქვეშ და ვიწყებთ ბრძოლას საქართველოს გადასარჩენად", — განაცხადა პაატა ციკოლიამ.