მოსკოვის რეგიონში ქალს შინაპატიმრობა იმისთვის შეუფარდეს, რომ ჩეჩნეთის ამჟამინდელი ლიდერის, რამზან კადიროვის მამის, რესპუბლიკის პირველი პრეზიდენტის, ახმატ კადიროვის მონუმენტზე ირონიული ფრაზა წააწერა.

როგორც ტელეგრამ-არხი Baza წერს, სამართალდამცავმა უწყებებმა განაცხადეს, რომ დაკავებულია 23 წლის ნატალია ა., რომელმაც ახმატ კადიროვის მონუმენტზე 13 ნოემბრის გვიან ღამით შემდეგი ფრაზა წააწერა — "ახმატ ქლიავი", (Akhmat sliva (ქლიავი)) "ახმატ სილას" (Akhmat sila (ძალა)) მაგივრად.

Kavkaz.Realii-ზე დაყრდნობით, "ოფიციალური პირებს არ დაუდასტურებიათ ინფორმაცია" ქალის დაკავებაზე, თუმცა Baza წერს, რომ ის ვანდალიზმის ბრალდებით დააკავეს.

ცნობილი არ არის წარწერების გაკეთების დროს ქალი მარტო იყო, თუ ვინმე ახლდა და არც ზუსტი დაკავების დროა ცნობილი.

პროპაგანდისტულ სლოგანი "ახმატ ძალა" გავრცელებული და ხშირადაა გამოყენებული ჩეჩნეთის რეჟიმის მიერ ახმატ კადიროვის საქებრად.

დღევანდელი ჩეჩნეთის მეთაურმა და ახმატ კადიროვის შვილმა, რამზან კადიროვმა უზრუნველყო, რომ ჩეჩნებს მადლიერება გამოეხატათ მამამისის მიმართ, რომელმაც, მისი მტკიცებით, რესპუბლიკაში მშვიდობა დაამყარა.

2004 წელს, ახმად კადიროვი დაბომბვას ემსხვერპლა. მისი შვილი რამზან კადიროვი 2007 წელს გახდა პრეზიდენტი და მალევე დაიწყო მამამისზე მითების შექმნის პროცესი.

ტელეგრამ-არხის Ostorozhno, Novosti-ს ინფორმაციით, ვიდეოები, რომელიც აღწერს მონუმენტზე წარწერის გაკეთებას, რამდენიმე მსხვილი მედიასაშუალებისთვის იყო გაგზავნილი, მათ შორის Ostorozhno, Novosti-სთვის.

Baza და სხვა ადგილობრივი მედიები წერენ, რომ ქალი იმ პირობით გაათავისუფლეს, რომ ქვეყანას არ დატოვებდა.

Ura.ru-ზე დაყრდნობით, წარწერის გაკეთებიდან მეორე დღეს, მემორიალი გაწმინდეს და პოლიციამ გამოძიება ვანდალიზმის მუხლით დაიწყო, ნატალია ა. კი შინაპატიმრობაში რჩება.

რუსეთის კანონმდებლობით, ვანდალიზმი 40 000 რუბლით (390$), 360 საათის სავალდებულო შრომით, ერთწლიანი გამოსასწორებელი შრომით ან ციხეში სამთვიანი პატიმრობით ისჯება.

Ostorozhno, Novosti აღნიშნავს, რომ ახმატ კადიროვის მონუმენტი მოსკოვში 2004 წლიდან დგას.

Kavkaz.Realii-ის თქმით, გასული წლის შემოდგომაზე, ღორის თავი მიიტანეს მონუმენტთან, რისთვისაც მოგვიანებით ნაციონალისტი დმიტრი კუდრიაშოვი ვანდალიზმის მუხლით დააკავეს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.