უნდა გაგრძელდეს მშვიდობიანი აქციები და უნდა შეიქმნას, პირობითი სახელი დავარქვათ — "ალტერნატიული პარლამენტი" იმ ადამიანების მიერ, რომლებიც არიან არჩეულები ოპოზიციის მხრიდან, — ამის შესახებ კოალიცია ძლიერი საქართველოს ლიდერმა, მამუკა ხაზარაძემ კოალიციის სამოქმედო გეგმაზე საუბრისას განაცხადა. მისი თქმით, 4 კოალიციიდან უნდა ჩამოყალიბდეს სპეციალური ჯგუფი და გამარჯვებული ხალხის სახელით სასწრაფოდ გაიგზავნონ ყველა იმ დედაქალაქში, სადაც საკითხები წყდება.

"გუშინ გავაჟღერეთ იდეა, მქონდა პრეზიდენტთანაც შეხვედრა. მარტო ქუჩის აქციები, რომელიც ძალიან აუცილებელია და უნდა გაგრძელდეს, არაა გამოსავალი, გვჭირდება სისტემური მუშაობა, ჩვენ გვჭირდება ერთიანობა კოალიციაში, გვჭირდება ურთიერთკოორდინაცია და გვჭირდება ალტერნატიული სიმძიმის პოლიტიკური ცენტრის დაფიქსირება, სადაც პრეზიდენტი იქნება წამყვანი ფიგურა, მის გარშემო უნდა მოხდეს ეს ყველაფერი.

შეთავაზება ძლიერი საქართველოსი არის ძალიან კონკრეტული. პირველი: უნდა გაგრძელდე მშვიდობიანი აქციები. არავის მივცემთ უფლებას, რომ ბავშვები დაარბიოს. ნებისმიერი სახელმწიფო უნდა იცავდეს წესრიგს, მაგრამ უსამართლობაზე დაფუძნებული წესრიგი არ არსებობს, მოპარული ხმებზე დაფუძნებული წესრიგი არ არსებობს.

მეორე: უნდა შეიქმნას, პირობითი სახელი დავარქვათ — ალტერნატიული ცენტრი, ალტერნატიული პარლამენტი იმ ადამიანების მიერ, რომლებიც არიან არჩეულები ოპოზიციის მხრიდან. პრეზიდენტი უნდა იყოს ამის სათავეში, 4 კოალიციიდან უნდა ჩამოყალიბდეს სპეციალური ჯგუფი, ყველა კოალიციას ჰყავს ყოფილი დიპლომატები და ელჩები და სასწრაფოდ გაიგზავნონ იმ ქალაქებში, სადაც პროცესები წყდება", — განაცხადა ხაზარაძემ.

მამუკა ხაზარაძემ ჟურნალისტებს განუცხადა, რომ მთავარი ახლა ახალგაზრდების გვერდით დგომაა. მისი თქმით, თუ მათ გვერდით არ დავდექით, ამ ქვეყანას მომავალი არ აქვს“.