კანონმდებლობა ახალარჩეული დეპუტატების უფლებამოსილების ცნობამდე პარტიულ სიებში არსებულ კანდიდატთა რეგისტრაციის გაუქმებას არ ითვალისწინებს, – ამის შესახებ ცესკო-ს იურიდიული დეპარტამენტის უფროსმა, გიორგი სანტურიანმა განაცხადა.

მისივე თქმით, რეგისტრაციის გაუქმება არ ხდება არც პარტიების მომართვის და არც პირადი განცხადების შემთხვევაში.

"მოქმედი კანონმდებლობა ახალარჩეული დეპუტატების უფლებამოსილების ცნობამდე პარტიულ სიებში არსებულ კანდიდატთა რეგისტრაციის გაუქმებას არ ითვალისწინებს. არ ითვალისწინებს როგორც პარტიების მომართვის შემთხვევაში, ასევე პირადი განცხადებების შემთხვევაში და სხვაგვარი რეგულირება საარჩევნო კოდექსით გათვალისწინებული არ არის", – აღნიშნა სანტურიანმა.

დღეს ცნობილი გახადა, რომ კოალიცია ცვლილებისთვის და ერთიანობა -ნაციონალური მოძრაობის წევრები ცესკოს სიების გასაუქმებლად მიმართავენ. ოპოზიციის ლიდერები საპარლამენტო მანდატებზე უარს ამბობენ და მოუწოდებენ ცენტრალურ საარჩევნო კომისიას, არ გაატაროს რეგისტრაციაში, როგორც არჩეული პარლამენტის წევრები და არ მისცენ დროებითი მოწმობა საქართველოს პარლამენტის წევრად არჩევის შესახებ.